ہالی ووڈ کی شہرۂ آفاق فلم جراسک پارک کے معروف اداکار سیم نیل 78 برس کی عمر میں پیر کے روز اچانک انتقال کر گئے۔
ان کے اہل خانہ نے اسی روز جاری کیے گئے ایک بیان میں ان کی وفات کی تصدیق کی۔
سیم نیل کے انسٹاگرام اکاؤنٹ پر جاری بیان میں کہا گیا کہ ان کا انتقال اچانک اور غیر متوقع تھا، تاہم یہ اطمینان کی بات ہے کہ وہ وفات کے وقت کینسر سے مکمل طور پر صحت یاب ہو چکے تھے۔
یہ بھی پڑھیں: غزہ سے متعلق پوسٹ لائک کرنے پر کام سے برطرف کیا گیا، ہالی ووڈ اداکارہ کیٹ بیکنسیل کا دعویٰ
بیان کے مطابق سیم نیل نے آسٹریلیا کے شہر سڈنی میں آخری سانس لی، اہل خانہ نے ان کی دیکھ بھال کرنے والے نجی اسپتال کے طبی عملے کا خصوصی شکریہ بھی ادا کیا۔
نیوزی لینڈ سے تعلق رکھنے والے سیم نیل نے 1993ء کی بلاک بسٹر فلم جراسک پارک میں ڈاکٹر ایلن گرانٹ کا یادگار کردار ادا کیا تھا۔
انہوں نے 2023 میں شائع ہونے والی اپنی سوانح عمری میں انکشاف کیا تھا کہ وہ تیسرے درجے کے نان ہاجکن لِمفوما میں مبتلا تھے اور ممکنہ طور پر زندگی کے آخری مرحلے سے گزر رہے تھے۔
Sam Neill, the New Zealand actor best known for playing paleontologist Dr Alan Grant in dinosaur blockbuster ‘Jurassic Park’ and whose career included more than 50 movies, died at the age of 78 https://t.co/L1wmCW8kBV
— Reuters (@Reuters) July 13, 2026
تاہم رواں برس اپریل میں انہوں نے اعلان کیا تھا کہ علاج کے بعد وہ خون کے سرطان سے مکمل طور پر صحت یاب ہو چکے ہیں۔
آسٹریلیا کے وزیر اعظم انتھونی البانیز نے سماجی رابطے کی ویب سائٹ پر تعزیتی پیغام میں کہا کہ سیم نیل نے بیماری کا مقابلہ بھی اسی وقار، مزاح اور عزم کے ساتھ کیا جس نے ان کی ہر اداکاری کو یادگار بنایا۔
’انہیں طویل عرصے تک یاد رکھا جائے گا۔ خدا انہیں اپنی جوارِ رحمت میں جگہ دے۔‘
سیم نیل نے اپنے فنی کیریئر کا آغاز 1970ء کی دہائی میں کیا تھا اور کئی دہائیوں پر محیط اپنے سفر میں فلموں اور ٹی وی ڈراموں میں درجنوں یادگار کردار ادا کیے۔
ان کی نمایاں تخلیقات میں جراسک پارک، پیکی بلائنڈرز، دی ہنٹ فار ریڈ اکتوبر اور دی پیانو شامل ہیں۔
اداکاری کے علاوہ سیم نیل نیوزی لینڈ کے جنوبی جزیرے کے خوبصورت علاقے سینٹرل اوٹاگو میں انگور کے باغات کی بھی ملکیت رکھتے تھے۔
