آسٹریا حکومت کا بڑا فیصلہ، آڈولف ہٹلر کا گھر پولیس اسٹیشن میں تبدیل

آسٹریا نے آڈولف ہٹلر کی جائے پیدائش کو باضابطہ طور پر پولیس اسٹیشن میں تبدیل کر دیا ہے تاکہ اس مقام کو نو نازی عناصر کی ممکنہ زیارت گاہ بننے سے روکا جا سکے اور اسے جمہوریت اور قانون کی حکمرانی کی علامت بنایا جا سکے۔

آسٹریا کے سرحدی شہر براوناؤ آم اِن میں واقع وہ عمارت، جہاں آڈولف ہٹلر پیدا ہوا تھا، بدھ کو باضابطہ طور پر پولیس اسٹیشن کے طور پر فعال کر دی گئی۔ حکومت کا کہنا ہے کہ اس اقدام کا مقصد اس عمارت کو نو نازی عناصر کا مرکز بننے سے روکنا ہے۔

برسوں کے تنازع کے بعد فیصلہ

یہ عمارت کئی برس تک نجی ملکیت میں رہی اور یہاں معذور افراد کی فلاحی تنظیم کام کرتی تھی۔ آسٹریا کی حکومت نے 2017 میں عمارت اپنے قبضے میں لی، جبکہ 2019 میں اسے پولیس اسٹیشن میں تبدیل کرنے کا فیصلہ کیا گیا۔

یہ بھی پڑھیں:ہٹلر سے متاثراسرائیلی رکن پارلیمنٹ نے غزہ سے مسلمانوں کے مکمل خاتمے کا مشورہ دیدیا

‘ہٹلر’ کی نسبت ختم کرنے کی کوشش

آسٹریا کی وزارتِ داخلہ کے شعبۂ تاریخ کے سربراہ اسٹیفن ملزوخ نے بتایا کہ منصوبے کا بنیادی مقصد عمارت کو آڈولف ہٹلر کی شخصیت سے منسوب علامتی حیثیت سے محروم کرنا تھا تاکہ اس کے گرد قائم ہونے والی ‘رومانویت’ اور کشش ختم کی جا سکے۔

پولیس جمہوریت اور قانون کی علامت ہے

افتتاحی تقریب سے خطاب کرتے ہوئے آسٹریا کے وزیر داخلہ گیرہارڈ کارنر نے کہا کہ موجودہ آسٹریائی وفاقی پولیس اس مقام سے وابستہ ماضی کی علامت کے بالکل برعکس ہے۔ ان کے بقول پولیس جمہوریت، آئین اور قانون کی حکمرانی کی نمائندہ ہے۔

‘نیور اگین فاشزم’ کا پیغام برقرار

عمارت کے باہر ماؤتھاؤزن حراستی کیمپ کی جانب سے نصب کیا گیا پتھر بدستور موجود ہے، جس پر ’نیور اگین فاشزم‘ یعنی ‘فاشزم دوبارہ کبھی نہیں’ درج ہے، تاہم اس پر ہٹلر کا نام تحریر نہیں۔ عمارت کے سفید اگلے حصے پر اب صرف  پولیس کا بورڈ نصب کیا گیا ہے۔

نو نازی سرگرمیوں میں نمایاں کمی

مقامی حکام کے مطابق اگرچہ راہ گیر اب بھی عمارت کے باہر تصاویر بناتے ہیں، تاہم نو نازی نظریات سے وابستہ افراد کی آمد کے واقعات اب نہایت کم رہ گئے ہیں۔

حکام نے بتایا کہ اب صرف ‘چھٹ پٹ واقعات’ پیش آتے ہیں، جو ماضی کے مقابلے میں بہت کم ہیں۔ آسٹریا میں ہٹلر کا سلیوٹ اور دیگر نازی علامات پہلے ہی قانوناً ممنوع ہیں۔

مزید پڑھیں:گروک چیٹ بوٹ کو ہٹلر کی تعریف کے حوالے سے گمراہ کیا گیا، ایلون مسک

مقامی آبادی نے تبدیلی قبول کر لی

براوناؤ آم اِن کے میئر یوہانس وائیڈباخر نے کہا کہ مجموعی طور پر شہر کے لوگوں نے اس منصوبے کو قبول کر لیا ہے اور وہ اس نئی صورتِ حال کے ساتھ مطمئن ہیں۔

ہولوکاسٹ متاثرین کی تنظیم کا اعتراض

دوسری جانب آسٹریا کی ہولوکاسٹ سے بچ جانے والے افراد کی مرکزی تنظیم ‘ماؤتھاؤزن کمیٹی’ نے اس عمارت کو پولیس اسٹیشن میں تبدیل کرنے کے فیصلے کو ‘نامناسب’ قرار دیا۔

تاہم حکومت کا مؤقف ہے کہ اس تبدیلی کا مقصد اس متنازع مقام کو انتہاپسندوں کی توجہ کا مرکز بننے سے روکنا ہے۔