امریکی صدر ڈونلڈ ٹرمپ کا کہنا ہے کہ چین کے صدر شی جن پنگ اور روس کے صدر ولادیمیر پوتن نے انہیں یقین دہانی کرائی ہے کہ وہ ایران کو ہتھیار فراہم نہیں کریں گے۔
یہ بھی پڑھیں: ایران لبنان میں اپنی پراکسیز کو فوری روکے ورنہ سخت جواب دیں گے، صدر ٹرمپ کی وارننگ
صدر ڈونلڈ ٹرمپ نے اپنے سوشل میڈیا پلیٹ فارم ٹروتھ سوشل پر جاری بیان میں کہا کہ بیجنگ میں حالیہ ملاقات کے دوران صدر شی جن پنگ نے انہیں واضح طور پر بتایا کہ وہ کسی بھی صورت میں اسلامی جمہوریہ ایران کو ہتھیار نہ دیں گے اور نہ ہی فروخت کریں گے اور اس یقین دہانی میں چینی کمپنیاں بھی شامل ہیں۔
امریکی صدر نے کہا کہ چین کے ساتھ اپنے تعلقات کو مدنظر رکھتے ہوئے وہ صدر شی جن پنگ کے اس بیان پر یقین رکھتے ہیں۔ انہوں نے کہا کہ ’میں بھی ان پر بہت بڑی مہربانیاں کر رہا ہوں‘۔
مزید پڑھیے: صدر ٹرمپ کی مدبرانہ قیادت کے باعث امریکا ایران مذاکرات ممکن ہوئے، وزیراعظم شہباز شریف
ڈونلڈ ٹرمپ نے کہا کہ یوکرین جنگ جاری ہونے کے باوجود روسی صدر ولادیمیر پیوٹن نے بھی انہیں بتایا کہ روس بھی ایران کو ہتھیار فروخت نہیں کرے گا۔
’امریکا براہ راست یوکرین کو ہتھیار فروخت نہیں کرتا‘
انہوں نے کہا کہ پیوٹن جانتے ہیں کہ امریکا براہ راست یوکرین کو ہتھیار فروخت نہیں کرتا بلکہ نیٹو کے رکن ممالک کو فروخت کرتا ہے۔
— Rapid Response 47 (@RapidResponse47) July 24, 2026
ڈونلڈ ٹرمپ کے مطابق نیٹو ممالک ان ہتھیاروں کی مکمل قیمت ادا کرتے ہیں اور بعد میں وہ ان ہتھیاروں کو کس طرح تقسیم کرتے ہیں اس بارے میں انہیں کوئی علم نہیں۔
امریکی صدر نے مزید کہا کہ ایران کے حوالے سے جن 2 بڑے ممالک یعنی چین اور روس کا اکثر ذکر کیا جاتا ہے ان کے خیال میں وہ ایران کو ہتھیار فراہم کرنے میں شریک نہیں ہیں۔
مزید پڑھیں: نیٹو سربراہی اجلاس، صرف 48 گھنٹوں میں امریکی صدر ڈونلڈ ٹرمپ نے عالمی سفارت کاری کا رخ بدل دیا
تاہم ڈونلڈ ٹرمپ نے خبردار کیا کہ اگر یہ دونوں ممالک ایران کو ہتھیار فراہم کرتے ہیں تو یہ ان کے اپنے مفاد میں بھی نہیں ہوگا۔
