دنیا بھر میں دریاؤں، جھیلوں اور دیگر قدرتی آبی ذخائر میں تیراکی، جسے وائلڈ سوئمنگ یا اوپن واٹر سوئمنگ کہا جاتا ہے، تیزی سے مقبول ہو رہی ہے۔
ماہرین کے مطابق قدرتی پانی کے قریب وقت گزارنے سے ذہنی دباؤ کم ہوتا ہے اور ذہنی صحت بہتر رہتی ہے، تاہم شدید بارش، سیوریج کے اخراج اور زرعی آلودگی کے باعث یہ سرگرمی بعض اوقات سنگین بیماریوں کا سبب بھی بن سکتی ہے۔
یہ بھی پڑھیں: دل کے لیے روزانہ کتنی کافی محفوظ؟ نئی تحقیق میں اہم انکشاف
ماہرین کا کہنا ہے کہ موسلا دھار بارش کے بعد عموماً 24 سے 72 گھنٹے تک دریاؤں کا پانی جراثیم کے لحاظ سے غیر محفوظ ہو سکتا ہے۔
اس دوران سیوریج کا پانی، بارش کے بہاؤ اور مٹی کے ذرات دریاؤں میں شامل ہو جاتے ہیں، جس سے پانی میں نقصان دہ بیکٹیریا اور جراثیم کی مقدار بڑھ جاتی ہے۔
تحقیقی مطالعات سے معلوم ہوا ہے کہ کھلے پانی میں تیراکی کے دوران جتنا زیادہ پانی منہ میں جائے، معدے اور آنتوں کی بیماریوں کا خطرہ اتنا ہی بڑھ جاتا ہے۔
Open-water swimming looks serene, but hidden risks—from leptospirosis to cyanobacteria—can strike after rain when official tests lag. Smell, clarity, and recent weather matter. Swimmers’ caution fuels conversation.
https://t.co/wjuLqix45G— Azat TV (@azattelevision) July 26, 2026
بچوں میں یہ خطرہ نسبتاً زیادہ ہوتا ہے کیونکہ وہ تیراکی کے دوران زیادہ پانی نگل لیتے ہیں۔
عام طور پر اس سے اسہال، پیٹ درد اور قے جیسی شکایات پیدا ہوتی ہیں، تاہم بعض صورتوں میں لیپٹوسپائروسس جیسی خطرناک بیکٹیریائی بیماری بھی لاحق ہو سکتی ہے، جو گردوں اور جگر کو متاثر کرنے کے ساتھ جان لیوا بھی ثابت ہو سکتی ہے۔
مزید پڑھیں: رات کی ڈیوٹی صحت پر کتنی بھاری پڑتی ہے؟ سائنسدانوں نے بہتر نیند کا نیا طریقہ بتا دیا
ماہرین نے خبردار کیا ہے کہ گرم یا ساکن پانی میں نیلگوں سبز کائی یعنی بلیو گرین الجی پیدا ہو سکتی ہے، جو ایسے زہریلے مادے خارج کرتی ہے جو جلد، آنکھوں، جگر اور اعصابی نظام کو نقصان پہنچا سکتے ہیں۔
اگر پانی سبز، دھندلا، جھاگ دار نظر آئے، مردہ مچھلیاں دکھائی دیں یا پانی سے سیوریج یا کیمیکل جیسی بو آئے تو تیراکی سے گریز کرنا چاہیے۔
ماہرین کے مطابق سرکاری پانی کے معیار کی جانچ مفید ضرور ہے، لیکن یہ ہمیشہ فوری صورتحال کی عکاسی نہیں کرتی کیونکہ ٹیسٹ کے نتائج اکثر ایک یا دو دن بعد سامنے آتے ہیں۔
مزید پڑھیں: کیا وزن کم کرنے والے انجیکشن بال گرنے کا سبب بن رہے ہیں؟
اسی لیے صرف سرکاری رپورٹس پر انحصار کرنے کے بجائے موسم، حالیہ بارش، پانی کی ظاہری کیفیت اور مقامی حالات کا جائزہ لینا بھی ضروری ہے۔
ماہرین صحت کا مشورہ ہے کہ کھلے پانی میں تیراکی کرتے وقت پانی نگلنے سے حتی الامکان بچیں، جسم پر موجود زخم ڈھانپیں، تیراکی کے فوراً بعد نہائیں اور بخار، سردی لگنے یا شدید سر درد جیسی علامات ظاہر ہونے پر فوری طبی معائنہ کرائیں۔
