لاہور میں اٹارنی جنرل آف پاکستان منصور اعوان کے گھر پر پولیس کے چھاپے کے معاملے میں ایس ایچ او سرور روڈ سمیت 11 اہلکاروں کے خلاف مقدمہ درج کرلیا گیا، جبکہ متعلقہ اہلکاروں کو چارج شیٹ بھی کر دیا گیا۔
پولیس کے مطابق اہلکاروں کو منصور اعوان کے گھر سے ملحقہ مکان کے بارے میں اطلاع موصول ہوئی تھی، تاہم غلطی سے کارروائی اٹارنی جنرل کے گھر پر کر دی گئی۔
اہلکاروں نے اختیارات سے تجاوز کیا، ایف آئی آر
ایف آئی آر کے متن کے مطابق ایس ایچ او سرور روڈ اور دیگر 11 اہلکاروں نے چھاپے کے دوران اختیارات سے تجاوز کیا، جس پر ان کے خلاف مقدمہ درج کرنے کے ساتھ انہیں چارج شیٹ بھی کیا گیا۔
پولیس گیٹ پھلانگ کر گھر میں داخل ہوئی، ڈرائیور کا دعویٰ
اٹارنی جنرل کے ڈرائیور عرفان نے الزام عائد کیا کہ ایس ایچ او سرور روڈ اہلکاروں کے ہمراہ گیٹ پھلانگ کر گھر میں داخل ہوئے۔ ان کے مطابق چھاپے کے دوران پولیس سی سی ٹی وی کیمروں کا سسٹم بھی اپنے ساتھ لے گئی۔
انہوں نے کہاکہ اس وقت گھر میں صرف ملازمین موجود تھے، جبکہ بعد ازاں پولیس سی سی ٹی وی فوٹیج حذف کرنے کے بعد ڈی وی آر واپس کرگئی۔
میڈیا رپورٹس کے مطابق پولیس کارروائی کے دوران گھر کے باہر رکھے گئے گملے بھی ٹوٹ گئے۔
ایس ایچ او نے عبوری ضمانت حاصل کرلی
دوسری جانب ایس ایچ او سرور روڈ نے مقدمہ درج ہونے کے بعد عدالت سے عبوری ضمانت حاصل کر لی۔
