بلوچستان کے معاون برائے داخلہ بابر یوسفزئی نے بارکھان میں دہشتگرد حملے کے دوران ڈی ایس پی مرید بگٹی کی شہادت پر گہرے دکھ اور افسوس کا اظہار کرتے ہوئے واقعے کی شدید مذمت کی ہے۔
اپنے بیان میں بابر یوسفزئی نے کہا کہ دہشتگردی کا یہ بزدلانہ حملہ انتہائی قابلِ مذمت ہے اور شہید ڈی ایس پی مرید بگٹی کی قربانی ہمیشہ یاد رکھی جائے گی۔ انہوں نے کہا کہ شہداء کی عظیم قربانیاں ہرگز رائیگاں نہیں جائیں گی اور ریاست دہشتگرد عناصر کو منطقی انجام تک پہنچانے کی بھرپور صلاحیت اور غیر متزلزل عزم رکھتی ہے۔
یہ بھی پڑھیے بارکھان: سیکیورٹی فورسز کا آپریشن، 7 دہشتگرد ہلاک، فائرنگ کے تبادلے میں میجر سمیت 5 جوان شہید
انہوں نے کہا کہ غم کی اس گھڑی میں حکومت اور پوری قوم شہید کے اہلِ خانہ کے ساتھ کھڑی ہے اور ان کے دکھ میں برابر کی شریک ہے۔
معاون برائے داخلہ نے بتایا کہ بارکھان میں سیکیورٹی فورسز اور قانون نافذ کرنے والے ادارے دہشتگردوں کے خلاف مؤثر کارروائی میں مصروف ہیں، جبکہ حملہ آوروں کا تعاقب جاری ہے۔ انہوں نے واضح کیا کہ امن خراب کرنے والے عناصر کسی رعایت کے مستحق نہیں اور قانون کی گرفت سے کوئی دہشتگرد نہیں بچ سکے گا۔
یہ بھی پڑھیے بلوچستان: بارکھان میں مسلح افراد نے بسوں سے اتار کر 7 مسافروں کو قتل کر دیا
بابر یوسفزئی نے اس عزم کا اعادہ کیا کہ بلوچستان میں امن و استحکام کے خلاف ہونے والی ہر سازش کو ناکام بنایا جائے گا۔ انہوں نے کہا کہ ریاست عوام کے جان و مال کے تحفظ کو یقینی بنانے کے لیے ہر ممکن اقدامات کر رہی ہے اور دہشتگردی کے مکمل خاتمے تک کارروائیاں جاری رہیں گی۔
