فیفا نے شمالی امریکا میں منعقدہ 2026 ورلڈ کپ کے دوران کیے گئے 308 گولز میں سے کیپ ورڈے کے دفاعی کھلاڑی سڈنی لوپس کابرال کے ارجنٹینا کے خلاف شاندار گول کو ٹورنامنٹ کا بہترین گول قرار دے دیا۔ یہ انتخاب فیفا کی جانب سے شارٹ لسٹ کیے گئے 12 گولز پر دنیا بھر کے شائقین کی ووٹنگ کے بعد کیا گیا۔
مزید پڑھیں: میسی کے گول سے 45 برس بعد کھلنے والا سفارتخانہ
24 سالہ کابرال نے راؤنڈ آف 32 میں ارجنٹینا کے خلاف اضافی وقت کے پہلے ہاف میں بائیں جانب سے اندر آکر ایک خوبصورت خم دار شاٹ کے ذریعے گیند کو گول کے اوپری کونے میں پہنچایا، جس پر گول کیپر ایمیلیانو مارٹینیز بھی بے بس دکھائی دیے۔ اس گول سے کیپ ورڈے نے مقابلہ 2-2 سے برابر کردیا، تاہم اضافی وقت کے دوسرے ہاف میں خود ساختہ گول کھانے کے باعث ٹیم ٹورنامنٹ سے باہر ہوگئی۔
کابرال نے فیفا سے گفتگو میں کہا کہ جب گیند گول کی جانب جا رہی تھی تو انہیں یقین ہی نہیں آ رہا تھا کہ انہوں نے ایسا شاندار شاٹ لگا دیا ہے۔ انہوں نے بتایا کہ گول کرنے کے بعد وہ اپنی والدہ اور دوست کے پاس اسٹیڈیم کی گیلری میں گئے کیونکہ انہوں نے میچ سے پہلے ان سے یہی وعدہ کیا تھا، تاہم ان کی والدہ خوشی سے بے ہوش ہوگئی تھیں۔
2002 میں نیدرلینڈز میں پیدا ہونے والے سڈنی لوپس کابرال نے اپنے کیپ ورڈین والدین کی وجہ سے کیپ ورڈے کی نمائندگی اختیار کی۔ وہ ماضی میں ایف سی ٹوئنٹے اور بنفیکا کے یوتھ سسٹمز سے وابستہ رہے جبکہ اس وقت ترکی کے کلب ٹرابزون اسپور کے لیے کھیل رہے ہیں۔
مزید پڑھیں:جب پاکستان ہاکی نے ارجنٹائن کو عالمی فٹبال کپ جتوایا
صرف قریباً5 لاکھ 80 ہزار آبادی والے مغربی افریقی ملک کیپ ورڈے نے اس ورلڈ کپ میں شاندار کارکردگی سے سب کو متاثر کیا، حتیٰ کہ بعد میں چیمپیئن بننے والی اسپین کی ٹیم بھی گروپ مرحلے میں اس کے خلاف فتح حاصل نہ کرسکی تھی۔
