ارجنٹائن کے عالمی شہرت یافتہ فٹبالر لیونل میسی نے فیفا ورلڈ کپ فائنل میں شکست کے بعد اپنے امریکی کلب انٹر میامی کے ساتھ دوبارہ ٹریننگ شروع کر دی ہے۔ میسی تقریباً 10 روز کے وقفے کے بعد ٹیم کے کیمپ میں واپس آئے ہیں۔
ارجنٹائن کے اسٹار فٹبالر اور عالمی کپ فاتح لیونل میسی نے ورلڈ کپ 2026 کے فائنل میں اسپین کے ہاتھوں شکست کے بعد پہلی بار اپنے کلب انٹر میامی کے ساتھ باقاعدہ ٹریننگ کا آغاز کر دیا ہے۔
میجر لیگ سوکر (ایم ایل ایس) کلب انٹر میامی نے سوشل میڈیا پر ایک ویڈیو جاری کی، جس میں 39 سالہ میسی اپنے دیرینہ ساتھی اور یوراگوئے کے اسٹرائیکر لوئس سواریز کے ہمراہ ٹریننگ گراؤنڈ میں داخل ہوتے دکھائی دیے۔
The Goat is baccckkk!!
Lionel Messi is back to train with Inter Miami just 10 days after losing the world cup pic.twitter.com/bsGV0NQYlk
— Binen (@BinenLutaya) July 29, 2026
ورلڈ کپ کے فائنل میں 19 جولائی کو اسپین کے خلاف 1-0 کی شکست کے بعد میسی اپنے آبائی شہر روزاریو میں اہلِ خانہ کے ساتھ وقت گزار رہے تھے۔ شکست کے اگلے روز انہوں نے سوشل میڈیا پر لکھا تھا کہ اس ہار کا دکھ بہت گہرا ہے اور اس زخم کو بھرنے میں کافی وقت لگے گا۔
میسی مسلسل دوسری مرتبہ ارجنٹائن کو عالمی چیمپئن بنانے کی کوشش کر رہے تھے، تاہم ٹیم اپنے اعزاز کا دفاع نہ کر سکی۔ انہوں نے ابھی تک یہ اعلان نہیں کیا کہ وہ ارجنٹائن کی قومی ٹیم کے لیے کھیلنا جاری رکھیں گے یا نہیں۔
انٹر میامی کے ہیڈ کوچ اور میسی کے قریبی دوست گیئرمو ہوؤس نے گزشتہ ہفتے کہا تھا کہ ورلڈ کپ جیسے بڑے ایونٹ کے بعد کھلاڑیوں کو جسمانی اور ذہنی طور پر بحال ہونے کے لیے وقت درکار ہوتا ہے، اس لیے میسی کی واپسی کی کوئی حتمی تاریخ طے نہیں کی گئی تھی۔
یہ بھی پڑھیں:اسپین سے فائنل ہارنے والی ارجنٹائن ٹیم کا ریڈ کارپٹ استقبال، میسی غائب
میسی اور ارجنٹائن کے مڈفیلڈر روڈریگو ڈی پال کو ایم ایل ایس آل اسٹار میچ میں شرکت سے بھی استثنیٰ دیا گیا، کیونکہ وہ حال ہی میں ورلڈ کپ کی ذمہ داریاں مکمل کر کے واپس آئے ہیں۔
اگرچہ میسی کی مسابقتی واپسی کی باضابطہ تاریخ کا اعلان نہیں کیا گیا، تاہم توقع ہے کہ وہ ہفتے کو کولمبس کریو کے خلاف میچ یا اس کے بعد شروع ہونے والے لیگز کپ میں انٹر میامی کی نمائندگی کر سکتے ہیں۔
