لاہور کے علاقے ہربنس پورہ میں بارش کے دوران ایک شکستہ 3 منزلہ مکان کی چھت گرنے سے 7 افراد جاں بحق جبکہ 3 افراد زخمی ہو گئے۔ ریسکیو ٹیموں نے ملبے سے لاشیں نکال لیں، تاہم مزید افراد کے دبے ہونے کے خدشے کے پیش نظر امدادی کارروائیاں جاری ہیں۔
ہربنس پورہ کے علاقے بھٹہ محمد دین کالونی، سکھ نہر کے قریب ایک شکستہ 3 منزلہ مکان کی چھت گرنے سے 7 افراد جاں بحق اور 3 افراد زخمی ہو گئے۔
لاہور کے علاقہ ہربنس پورہ (محمد دین کالونی) میں ایک مکان کی چھت گرنے کے نتیجے میں 15 افراد ملبے تلے دب گئے۔
پاکستان مرکزی مسلم لیگ شعبہ خدمت خلق لاہور کی ٹیمیں فوری طور پر موقع پر پہنچے اور ریسکیو 1122 کے اہلکاروں کے ساتھ امدادی و ریسکیو سرگرمیوں میں بھرپور حصہ لے رہے ہیں۔ pic.twitter.com/IyQ1531FXt
— PMML (@PMML_Media) July 29, 2026
ریسکیو 1122 کے مطابق واقعہ رات تقریباً 10 بج کر 15 منٹ پر پیش آیا۔ مکان کی چھت مٹی اور ٹی آر گارڈرز سے تعمیر کی گئی تھی، جو حالیہ بارشوں کے باعث اچانک منہدم ہو گئی۔ حادثے کے وقت عمارت میں تین خاندان رہائش پذیر تھے۔
ریسکیو حکام کا کہنا ہے کہ ملبے سے 7 افراد کی لاشیں نکال لی گئی ہیں، جبکہ زخمیوں کو فوری طور پر طبی امداد کے لیے قریبی اسپتال منتقل کر دیا گیا ہے۔ مزید افراد کے ملبے تلے دبے ہونے کے خدشے کے باعث ریسکیو آپریشن بدستور جاری ہے۔
امدادی کارروائیوں میں ریسکیو کی 6 ایمرجنسی گاڑیاں اور 20 سے زائد اہلکار حصہ لے رہے ہیں، جو بھاری مشینری کی مدد سے ملبہ ہٹانے میں مصروف ہیں۔
یہ بھی پڑھیں:کاہنہ سانحے کے بعد پنجاب حکومت کا بڑا اقدام، ’اپنا گھر، محفوظ گھر‘ پروگرام شروع کرنے کا فیصلہ
دوسری جانب وزیراعلیٰ پنجاب مریم نواز نے واقعے پر گہرے دکھ اور افسوس کا اظہار کرتے ہوئے جاں بحق افراد کے لواحقین سے تعزیت کی ہے۔ وزیراعلیٰ کی ہدایت پر ڈپٹی کمشنر لاہور اور دیگر انتظامی افسران فوری طور پر جائے حادثہ پہنچ گئے، جبکہ زخمیوں کو بہترین طبی سہولیات فراہم کرنے کی ہدایت بھی جاری کی گئی۔
واضح رہے کہ حالیہ مون سون بارشوں کے دوران لاہور کے مختلف علاقوں، جن میں شالیمار روڈ، شاداب کالونی اور کاہنہ شامل ہیں، بوسیدہ عمارتوں اور مکانوں کی چھتیں گرنے کے متعدد واقعات پیش آ چکے ہیں، جس کے بعد خستہ حال عمارتوں کی حفاظت اور نگرانی سے متعلق خدشات مزید بڑھ گئے ہیں۔
