وفاقی وزیر برائے امور کشمیر و گلگت بلتستان امیر مقام نے آزاد کشمیر کے علاقے راولاکوٹ میں دھرنے پر بیٹھے افراد کو مذاکرات کی پیشکش کرتے ہوئے کہا ہے کہ مسائل کا حل بات چیت کے ذریعے ہی ممکن ہے۔
ایک نجی چینل کے پروگرام میں گفتگو کرتے ہوئے امیر مقام نے کہا کہ راولاکوٹ کے لوگ کشمیری ہیں، تھے اور ہمیشہ کشمیری رہیں گے۔
یہ بھی پڑھیں:دانش اسکولوں کا دائرہ ہر ڈویژن تک بڑھایا جا رہا ہے، کشمیر کو موٹروے سے بھی جوڑیں گے، امیر مقام
انہوں نے دھرنے میں شریک افراد کو مذاکرات کی دعوت دیتے ہوئے کہا کہ دھرنے میں شامل تمام افراد دہشت گرد نہیں، ان میں اکثریت محب وطن لوگوں کی ہے۔ ان کا کہنا تھا کہ ایسے افراد منفی عزائم رکھنے والوں سے خود کو الگ کریں اور حکومت کے ساتھ بیٹھ کر بات چیت کریں۔
وفاقی وزیر نے وزیر دفاع خواجہ آصف کے بیان کو ان کی ذاتی رائے قرار دیتے ہوئے کہا کہ یہ حکومت یا حکمران جماعت کی پالیسی نہیں ہے۔ انہوں نے کہا کہ معرکۂ حق میں بھی راولاکوٹ کے عوام نے پاکستان کے لیے قربانیاں دیں، جبکہ پونچھ کے عوام سرحدوں کے محافظ ہیں اور عزت و احترام کے مستحق ہیں۔
