پاکستان کرکٹ بورڈ (پی سی بی) نے سابق جنوبی افریقی کرکٹر مائیکل اسمتھ کو پاکستان مینز کرکٹ ٹیم کا نیا بیٹنگ کوچ مقرر کرنے کا اعلان کر دیا ہے۔
پی سی بی کے مطابق 46 سالہ مائیکل اسمتھ کو 2 سال کے لیے بیٹنگ کوچ مقرر کیا گیا ہے اور وہ ریڈ بال اور وائٹ بال، دونوں فارمیٹس میں قومی ٹیم کے ساتھ کام کریں گے۔
مزید پڑھیں:ٹیسٹ کپتانی دوبارہ ملنے پر بابر اعظم کا پیغام، ویسٹ انڈیز دورے سے قبل ذمہ داری پر فخر کا اظہار
مائیکل اسمتھ اپنے فرسٹ کلاس، لسٹ اے اور ٹی20 کیریئر میں مجموعی طور پر 7 ہزار 29 رنز بنا چکے ہیں، جن میں 9 سینچریاں اور 40 نصف سینچریاں شامل ہیں۔ دائیں ہاتھ کے بلے باز نے 2003 سے 2013 کے دوران 89 فرسٹ کلاس، 72 لسٹ اے اور 16 ٹی20 میچز کھیلے۔
وہ لیول فور کوچنگ کوالیفکیشن کے حامل ہیں اور پاکستان سپر لیگ (پی ایس ایل) کی 3 فرنچائزز اسلام آباد یونائیٹڈ، کراچی کنگز اور ملتان سلطانز کے کوچنگ اسٹاف کا حصہ رہ چکے ہیں۔
اس کے علاوہ مائیکل اسمتھ آسٹریلیا کی ہوبارٹ ہریکینز اور کرکٹ تسمانیہ کے بیٹنگ کوچ بھی رہ چکے ہیں، جبکہ کوچنگ کنسلٹنٹ کے طور پر جنوبی افریقہ کی ’کے زیڈ این اِن لینڈ‘ اور ’ایسٹرن پروونس‘ ٹیموں کے ساتھ بھی خدمات انجام دے چکے ہیں۔
مزید پڑھیں:ویسٹ انڈیز پہلی اننگز میں 344 رنز بنا کر آؤٹ، روسٹن چیس کی نصف سینچری، ساجد خان کی 4 وکٹیں
پی سی بی کے مطابق مائیکل اسمتھ 19 اگست سے شروع ہونے والی پاکستان اور انگلینڈ کے درمیان 3 ٹیسٹ میچوں کی سیریز سے قبل قومی ٹیم کو جوائن کریں گے۔
