خیبرپختونخوا کے ضلع اپر دیر میں شدید مون سون بارشوں کے باعث ندی نالوں میں طغیانی کے دوران رات گئے سیاحوں کی ایک گاڑی برساتی نالہ عبور کرتے ہوئے پانی کے تیز بہاؤ میں بہہ کر نالے میں جا گری۔ خوش قسمتی سے ڈرائیور سمیت گاڑی میں سوار تمام مسافر محفوظ رہے اور واقعے میں کوئی جانی نقصان نہیں ہوا۔
مقامی ذرائع کے مطابق حادثہ اس وقت پیش آیا جب سیاحوں کی گاڑی رات کے وقت برساتی نالہ عبور کرنے کی کوشش کر رہی تھی۔ تیز بہاؤ کے باعث گاڑی بے قابو ہو کر نالے میں جا گری تاہم بروقت امداد اور مسافروں کی احتیاط کے باعث تمام افراد بحفاظت باہر نکل آئے۔
تمام سیاح جو پہاڑی علاقوں میں ہیں ان سے گزارش ہے ندی نالوں سے دور رہیں، بارشیں جاری ہیں جس کی وجہ سے طغیانی ہے
اپر دیر رات میں سیاحوں کی ایک گاڑی پانی کراس کرتے ہوئے، نالے میں جا گری خوش قسمتی سے ڈرائیور اور تمام مسافر اس حادثے میں محفوظ رہے___
جلد بازی جان کی بازی___ pic.twitter.com/r97LgwbgTl
— Pakistan Tourism (@PakistanJannatt) August 3, 2026
دوسری جانب مون سون بارشوں کے باعث خیبرپختونخوا کے بالائی اضلاع میں متعدد ندی نالے بپھر گئے ہیں جس سے اچانک سیلاب (فلیش فلڈ) کا خطرہ بھی بڑھ گیا ہے۔
سیاحتی اداروں اور مقامی انتظامیہ نے تمام سیاحوں سے اپیل کی ہے کہ وہ بارشوں کے دوران ندی نالوں، برساتی ریلوں اور کچے راستوں سے دور رہیں اور کسی بھی صورت پانی کے بہاؤ کو عبور کرنے کی کوشش نہ کریں خصوصاً رات کے وقت غیر ضروری سفر سے گریز کیا جائے۔
حکام کا کہنا ہے کہ پہاڑی علاقوں کا سفر کرنے والے افراد موسمی صورتحال، مقامی انتباہات اور انتظامیہ کی ہدایات پر سختی سے عمل کریں تاکہ کسی بھی ناخوشگوار واقعے سے بچا جا سکے۔
