وفاقی وزیر برائے منصوبہ بندی، ترقی و خصوصی اقدامات احسن اقبال اور وفاقی وزیر اطلاعات و نشریات عطا اللہ تارڑ کے درمیان ملاقات میں پبلک سیکٹر ڈویلپمنٹ پروگرام (پی ایس ڈی پی) کے تحت پاکستان ٹیلی ویژن (پی ٹی وی) کی ری ویمپنگ اور اسے جدید خطوط پر استوار کرنے کے منصوبے پر تفصیلی تبادلہ خیال کیا گیا۔
مزید پڑھیں:’عینک والا جن‘ کے مصنف حفیظ طاہر کا پی ٹی وی کی اے آئی فلم پر احتجاج، اجازت نہ لینے کا الزام
ملاقات کے دوران وفاقی وزیر اطلاعات و نشریات عطا اللہ تارڑ نے کہا کہ پی ٹی وی کی ری ویمپنگ کے منصوبے کی تکمیل کے لیے پی ایس ڈی پی کے تحت وزارتِ منصوبہ بندی کے تعاون کی ضرورت ہے۔
انہوں نے کہا کہ گلگت بلتستان میں بین الاقوامی کھیلوں کے مقابلوں کی براہِ راست نشریات کے لیے مقامی براڈکاسٹنگ انفراسٹرکچر ناگزیر ہے، جبکہ موجودہ صورتحال میں او بی وینز اسلام آباد سے بھیجنا پڑتی ہیں، جس سے نشریاتی انتظامات متاثر ہوتے ہیں۔
عطا اللہ تارڑ نے مزید کہا کہ پی ٹی وی کے ماسٹر کنٹرول رومز (ایم سی آرز) کو جدید تقاضوں سے ہم آہنگ کرنا بھی وقت کی اہم ضرورت ہے تاکہ قومی نشریاتی ادارے کی استعداد کار میں اضافہ کیا جا سکے۔
اس موقع پر وفاقی وزیر منصوبہ بندی احسن اقبال نے کہا کہ پی ٹی وی ایک قومی اثاثہ ہے، جس کی بحالی اور اسے جدید سہولتوں سے آراستہ کرنا حکومت کی ترجیحات میں شامل ہے۔
مزید پڑھیں:پی ٹی وی میں سنسر شپ ہمیشہ رہی، مقصد انتشار سے بچنا ہوتا ہے، شازیہ سکندر
انہوں نے کہا کہ پاکستان ٹیلی ویژن نے قومی شناخت، ثقافتی ورثے کے فروغ اور قومی یکجہتی کو مضبوط بنانے میں ہمیشہ اہم کردار ادا کیا ہے، جسے مزید مؤثر بنانے کے لیے ہر ممکن تعاون فراہم کیا جائے گا۔
