دنیا کی معروف میوزک اسٹریمنگ کمپنی اسپاٹیفائی نے اعلان کیا ہے کہ جون کے اختتام تک اس کے ماہانہ فعال صارفین کی تعداد 77 کروڑ 70 لاکھ تک پہنچ گئی، جو گزشتہ سہ ماہی کے مقابلے میں ایک کروڑ 60 لاکھ زیادہ ہے۔
خبر رساں ادارے کے مطابق کمپنی نے بتایا کہ اگرچہ صارفین کی تعداد میں اضافہ ہوا، تاہم یہ ماہرین کے اندازے سے 10 لاکھ کم رہی۔ اسپاٹیفائی نے خبردار کیا ہے کہ رواں سال کی تیسری سہ ماہی میں صارفین کے اضافے کی رفتار کچھ سست ہوسکتی ہے اور اندازہ ہے کہ تقریباً ایک کروڑ 10 لاکھ نئے صارفین شامل ہوں گے۔
یہ بھی پڑھیں: اسپاٹیفائی کی 20ویں سالگرہ: صارفین کے لیے یادگار متعارف
کمپنی کے بیان کے بعد نیویارک اسٹاک ایکسچینج میں اسپاٹیفائی کے حصص کی قیمت میں ابتدائی کاروبار کے دوران 2.6 فیصد کمی ریکارڈ کی گئی۔
اسپاٹیفائی کے مطابق سہ ماہی کے دوران فیس ادا کرنے والے صارفین کی تعداد 30 کروڑ ہو گئی، جو گزشتہ سہ ماہی کے مقابلے میں 70 لاکھ زیادہ ہے اور توقعات سے 10 لاکھ زیادہ ہے۔ یہ وہ صارفین ہیں جو اشتہارات کے بغیر سروس استعمال کرنے کے لیے فیس ادا کرتے ہیں۔
کمپنی کا سہ ماہی آپریٹنگ منافع گزشتہ سال کے اسی عرصے کے مقابلے میں 61 فیصد بڑھ کر 65 کروڑ 50 لاکھ یورو تک پہنچ گیا، جبکہ آمدنی 14 فیصد اضافے کے ساتھ 4.8 ارب یورو رہی۔
اسپاٹیفائی کے شریک چیف ایگزیکٹو ایلکس نورسٹروم نے کہا کہ کمپنی کا کاروبار مضبوط بنیادوں پر ترقی کر رہا ہے اور مستقبل میں مزید مواقع موجود ہیں۔
یہ بھی پڑھیں: اسپاٹیفائی کا انسانی گلوکاروں کو اے آئی سے الگ کرنے کے لیے بڑا اقدام، ویریفائیڈ بیج متعارف کرادیا
انہوں نے کہا کہ اسپاٹیفائی صارفین کے روزمرہ معمولات کا حصہ بن چکی ہے، چاہے سفر ہو، ورزش، تعلیم، کھیل، کھانے کا وقت یا آرام کا مرحلہ۔
کمپنی نئے صارفین کو راغب کرنے کے لیے اپنی سہولیات میں مسلسل اضافہ کر رہی ہے۔ حال ہی میں اس نے مصنوعی ذہانت سے تیار کردہ ذاتی نوعیت کے مختصر پوڈکاسٹس کا آغاز کیا ہے، جنہیں صارفین کی پسند کے مطابق ترتیب دیا جاتا ہے۔
اسپاٹیفائی نے یہ بھی اعلان کیا ہے کہ اس کے فیس ادا کرنے والے صارفین میں شامل فنکاروں کے سب سے زیادہ شوقین مداحوں کو سرکاری فروخت شروع ہونے سے پہلے موسیقی کے پروگراموں کے ٹکٹ خریدنے کی سہولت دی جائے گی۔
