پاکستان کرکٹ بورڈ (پی سی بی) نے ڈومیسٹک کرکٹر حمزہ نذر کے خلاف تادیبی کارروائی کرتے ہوئے انہیں 2 سال کے لیے ہر قسم کی ڈومیسٹک اور بین الاقوامی کرکٹ سرگرمیوں سے معطل کر دیا ہے، جبکہ ان پر 10 لاکھ روپے جرمانہ بھی عائد کیا گیا ہے۔
پی سی بی کی جانب سے جاری بیان کے مطابق یہ کارروائی ایک انکوائری کمیٹی کی رپورٹ کی روشنی میں کی گئی، جس نے حمزہ نذر کی جانب سے ویزا درخواست کے دوران فراہم کی گئی معلومات کا جائزہ لیا تھا۔
بورڈ کے مطابق تحقیقات میں یہ بات سامنے آئی کہ حمزہ نذر نے درخواست جمع کراتے وقت مکمل اور درست معلومات فراہم نہیں کیں، بعض اہم حقائق چھپائے اور گمراہ کن معلومات فراہم کیں، جو بورڈ کے ضابطہ اخلاق اور قواعد و ضوابط کی خلاف ورزی کے زمرے میں آتا ہے۔
پی سی بی نے بتایا کہ معاملے کی شفاف تحقیقات کے لیے 3 رکنی انکوائری کمیٹی تشکیل دی گئی تھی، جس نے تمام شواہد کا جائزہ لینے کے ساتھ حمزہ نذر کو بھی اپنا مؤقف پیش کرنے کا مکمل موقع فراہم کیا۔
پاکستان کرکٹ بورڈ نے واضح کیا کہ غلط بیانی، حقائق چھپانے اور گمراہ کن معلومات فراہم کرنے جیسے معاملات کو انتہائی سنجیدگی سے لیا جاتا ہے اور کسی بھی فرد کو ایسے اقدامات کی اجازت نہیں دی جا سکتی جو بورڈ، پاکستان کرکٹ یا اس کی ساکھ کو نقصان پہنچائیں۔
بورڈ کا کہنا ہے کہ کرکٹ سے وابستہ تمام افراد پر لازم ہے کہ وہ دیانت داری، شفافیت اور پیشہ ورانہ اخلاقیات کے اعلیٰ معیار کی پابندی کریں، اور ان اصولوں کی خلاف ورزی کی صورت میں بلاامتیاز کارروائی عمل میں لائی جائے گی۔
