سیکیورٹی فورسز نے بلوچستان کے ضلع واشک اور مستونگ میں انٹیلی جنس اطلاعات کی بنیاد پر 2 الگ الگ کارروائیوں میں 12 دہشتگرد ہلاک کر دیے۔
یہ بھی پڑھیں: پاکستان اور امریکا کا دہشتگردی کے خلاف تعاون مزید مضبوط بنانے پر اتفاق
پاک فوج کے شعبہ تعلقات عامہ (آئی ایس پی آر) کے مطابق 5 اور 6 اگست 2026 کو یہ کارروائیاں ’ردالفساد 3‘ کے تحت جاری انٹیلی جنس بیسڈ آپریشنز کے سلسلے میں کی گئیں جن کا مقصد ملک میں دہشتگردی کے خاتمے کے لیے کارروائیاں تیز کرنا ہے۔
آئی ایس پی آر کے مطابق 5 اگست کو ضلع واشک میں سیکیورٹی فورسز کو دہشتگردوں کی نقل و حرکت کی اطلاع ملی جس پر فوری کارروائی کرتے ہوئے فورسز نے انہیں مؤثر انداز میں نشانہ بنایا۔ کارروائی کے دوران 6 دہشتگرد ہلاک کر دیے گئے۔
ترجمان پاک فوج کے مطابق 6 اگست کو ضلع مستونگ میں ایک اور انٹیلی جنس بیسڈ آپریشن کیا گیا جہاں سکیورٹی فورسز اور دہشتگردوں کے درمیان شدید فائرنگ کا تبادلہ ہوا۔ کارروائی کے نتیجے میں مزید چھ دہشت گرد مارے گئے جبکہ ان کا ایک ٹھکانہ بھی تباہ کر دیا گیا۔
مزید پڑھیے: افغانستان دہشتگرد گروہوں کی محفوظ پناہ گاہ بن چکا، عالمی برادری مؤثر اقدامات کرے، پاکستان
آئی ایس پی آر نے کہا کہ وفاقی ایپکس کمیٹی کے منظور کردہ قومی ایکشن پلان کے تحت ’عزمِ استحکام‘ کے وژن کے مطابق سکیورٹی فورسز اور قانون نافذ کرنے والے ادارے ملک سے بیرونی سرپرستی میں ہونے والی دہشتگردی کے مکمل خاتمے کے لیے بھرپور کارروائیاں جاری رکھیں گے۔
