جرمنی کے شہر ہالبرشٹٹ کے ایک تاریخی گرجا گھر میں دنیا کا سست ترین موسیقی پروگرام جاری ہے، جہاں ایک ہی موسیقی کی دھن 639 سال تک بجانے کا منصوبہ بنایا گیا ہے، جو سن 2640 میں مکمل ہوگا۔
یہ منفرد منصوبہ معروف موسیقار جان کیج کی تخلیق ’آرگن ٹو یا جتنا ممکن ہو آہستہ‘ پر مبنی ہے، جسے جان کیج آرگن پروجیکٹ کے تحت پیش کیا جارہا ہے۔
یہ بھی پڑھیں: چباتے ہی موسیقی بجانے والی لولی پاپ متعارف، قیمت کیا ہوگی؟
منصوبے کا آغاز سن 2000 میں ہوا، جبکہ باقاعدہ موسیقی کا آغاز 5 ستمبر 2001 کو جان کیج کی 89ویں سالگرہ کے موقع پر کیا گیا۔ ابتدا میں تقریباً ڈیڑھ سال تک خاموشی رکھی گئی، جس کے بعد 5 فروری 2003 کو پہلی بار آرگن کی آواز سنائی دی۔
حال ہی میں اس منفرد پروگرام میں 17ویں بار دھن تبدیل کی گئی، جس کے دوران سات سُروں میں ایک نیا سُر شامل کیا گیا اور آٹھویں پائپ نصب کیا گیا، جس سے آرگن کی آواز میں تبدیلی آئی۔
تقریب میں 150 سے زائد افراد تاریخی برچارڈی چرچ میں موجود تھے، جبکہ درجنوں افراد نے اسے براہِ راست نشریات کے ذریعے دیکھا۔
یہ بھی پڑھین: ساون، چائے اور موسیقی: بارش میں بھیگتے بل بورڈ کو گنیز ورلڈ ریکارڈ کا اعزاز کیوں ملا؟
منصوبے کے منتظمین کے مطابق تیز رفتار دنیا میں یہ موسیقی لوگوں کو سکون، صبر اور حال میں جینے کا احساس دلاتی ہے۔
اس منصوبے میں بجلی سے چلنے والا ہوا کا نظام آرگن میں مسلسل ہوا فراہم کرتا ہے تاکہ آواز بغیر رکے جاری رہے، جبکہ دھن میں تبدیلی صرف مخصوص وقفوں کے بعد ہاتھ سے کی جاتی ہے۔
یہ منفرد موسیقی پروگرام 4 ستمبر 2640 کو اختتام پذیر ہوگا، جسے دنیا کی طویل ترین اور سست ترین موسیقی پیشکش قرار دیا جا رہا ہے۔
