ملائیشیا کی شاہی خاندان سے تعلق رکھنے والی شہزادی راجا تنگکو پوتیری ایلیانا عالیہ نے برطانوی ریسنگ ڈرائیور کرسٹوفر لیونل فروگٹ سے شادی کرلی۔
شاہی جوڑے کی شادی 7 اگست کو کوالالمپور کے شانگری لا ہوٹل میں ہوئی، جس میں پاہانگ کے سلطان عبداللہ سمیت شاہی خاندان کے دیگر افراد نے شرکت کی۔
یہ بھی پڑھیں: سوئٹزرلینڈ کی شادی نے امبانیز کا ریکارڈ بھی توڑ ڈالا
شہزادی ایلیانا پاہانگ کے سلطان عبداللہ ریعایت الدین المصطفیٰ باللہ شاہ کی صاحبزادی ہیں، جو 2019 سے 2024 تک ملائیشیا کے بادشاہ بھی رہ چکے ہیں۔ ملائیشیا میں بادشاہت کا منفرد نظام رائج ہے، جس کے تحت ملک کے 9 موروثی حکمران باری باری 5 سال کے لیے بادشاہ بنتے ہیں۔
شادی کی تقریبات اسلامی اور ملائی شاہی روایات کے مطابق منعقد ہوئیں۔ شادی کی کارروائی سے قبل کرس فروگٹ نے سنت نماز ادا کی، جس کے بعد نکاح کی تقریب ہوئی۔ جوڑے نے شادی کی انگوٹھیاں پہنائیں اور مہر کی ادائیگی کی رسم بھی مکمل کی۔
View this post on Instagram
تقریب کے بعد دعا اور شاہی روایات کے تحت مختلف رسومات ادا کی گئیں، جن میں نوبیاہتا جوڑے پر علامتی طور پر پانی چھڑکنے کی رسم بھی شامل تھی۔
تقریب میں پاہانگ کے وزیر اعلیٰ وان روسڈی وان اسماعیل اور متحدہ عرب امارات کے شیخ محمد بن حمد بن تہنون آل نہیان سمیت دیگر اہم شخصیات بھی شریک ہوئیں۔
پاہانگ کے شاہی محل نے شادی کے بعد جاری بیان میں شہزادی ایلیانا اور کرسٹوفر فروگٹ کے لیے خوشی، برکت اور خوشحالی کی دعا کی۔
شہزادی کا شاہانہ لباس
شہزادی ایلیانا نے شادی کے موقع پر ملائیشیا کے معروف ڈیزائنر رضوان رضی ول کا تیار کردہ لباس زیب تن کیا۔ انہوں نے ملکہ عزیزہ کا ہیرے جڑا تاج بھی پہنا، جو پاہانگ کے شاہی خاندان کا قیمتی ورثہ ہے۔
View this post on Instagram
یہ تاج پہلی مرتبہ برسلز کے بیلجئم زیورات فروش وولفرز سے حاصل کیا گیا تھا اور اس سے قبل پاہانگ کے شاہی خاندان کی دیگر خواتین بھی اسے شادی کی تقریبات میں پہن چکی ہیں۔
کرس فروگٹ کون ہیں؟
32 سالہ کرسٹوفر فروگٹ برطانوی ریسنگ ڈرائیور ہیں اور جی ٹی ریسنگ کے مقابلوں میں حصہ لیتے ہیں۔ وہ یورپ کے جی ٹی ورلڈ چیلنج کے برداشت پر مبنی مقابلوں میں بھی شریک رہے ہیں۔
یہ بھی پڑھیں: سدھارتھ ملہوترا اور کیارا ایڈوانی کی شادی کی تاریخ طے ہو گئی
موٹر ریسنگ میں ان کی دلچسپی اٹلی میں فراری کی ڈرائیونگ آزمائش کے بعد مزید بڑھی۔ فراری کے ٹیسٹ ٹریک پر ڈرائیونگ کے تجربے نے انہیں پیشہ ورانہ ریسنگ کو سنجیدگی سے اختیار کرنے کی ترغیب دی، جس کے بعد انہوں نے بین الاقوامی موٹر ریسنگ میں اپنا سفر شروع کیا۔
شہزادی ایلیانا اور کرسٹوفر فروگٹ نے اپنی نجی زندگی کو زیادہ تر ذرائع ابلاغ کی نظروں سے دور رکھا، اس لیے شادی سے قبل ان کے تعلق کے بارے میں زیادہ معلومات سامنے نہیں آئیں۔
