ویڈیو اسٹریمنگ پلیٹ فارم ٹوئچ نے صارفین کو ایمیزون کی جانب سے ان کے مواد کو مصنوعی ذہانت کی تربیت کے لیے استعمال کرنے سے روکنے کا اختیار دے دیا ہے۔
رپورٹ کے مطابق ایمیزون نے تصدیق کی تھی کہ ٹوئچ کی مقبول اسٹریمز، تصاویر، کلپس اور چیٹ کا مواد اے آئی ماڈلز کی تربیت کے لیے استعمال کیا جارہا ہے، جس پر دنیا بھر میں صارفین کی جانب سے شدید ردعمل سامنے آیا۔
ٹوئچ نے اب صارفین کو اپنے چینل اکاؤنٹس میں موجود سیٹنگ کے ذریعے اے آئی ڈیٹا کلیکشن بند کرنے کی سہولت فراہم کردی ہے۔ یہ اختیار فی الحال ڈیفالٹ طور پر فعال ہے۔
ٹوئچ کے چیف پروڈکٹ آفیسر مائیک منٹن اور شعبہ کمیونٹی کی سربراہ میری کِش نے بھی تسلیم کیا کہ صارفین اس تبدیلی سے خوش نہیں ہوں گے۔ ان کے مطابق یہ بھی واضح نہیں کہ ایمیزون ماضی میں صارفین کے مواد سے اے آئی ماڈلز کی تربیت کرچکا ہے یا نہیں۔
مزید پڑھیں:اے آئی کمالات: ایمیزون و دیگر بارانی جنگلات اب جائے بغیر بھی دیکھے اور محسوس کیے جاسکتے ہیں
رپورٹ کے مطابق ایمیزون کی جانب سے ٹوئچ کے مواد کو اے آئی ٹریننگ کے لیے استعمال کرنے کے فیصلے کو صارفین کی جانب سے شدید تنقید کا سامنا ہے، جبکہ کمپنی کا کہنا ہے کہ یہ اقدام اس کی مصنوعی ذہانت کے شعبے کو وسعت دینے کی حکمت عملی کا حصہ ہے۔
