بھارتی ریاست اتراکھنڈ میں زیر تعمیر سرنگ میں لینڈ سلائیڈنگ کے باعث پانی اور ملبہ داخل ہونے سے 7 مزدور ہلاک جبکہ 13 زخمی ہوگئے۔ حادثہ جمعرات کی شب ہمالیائی ریاست میں سرکاری ہائیڈرو پاور منصوبے کے لیے سرنگ کی تعمیر کے دوران پیش آیا۔
ریاستی ڈیزاسٹر مینجمنٹ اتھارٹی کے مطابق 19 مزدوروں کو بحفاظت نکال لیا گیا ہے، تاہم 3 افراد تاحال لاپتا ہیں۔ حکام کی جانب سے جاری کی گئی ویڈیوز میں امدادی کارکنوں کو سر پر ٹارچیں لگائے عارضی بیڑوں کے ذریعے سرنگ کے زیر آب حصے تک پہنچنے کی کوشش کرتے دیکھا جا سکتا ہے۔
اتراکھنڈ میں گزشتہ کئی روز سے شدید مون سون بارشوں کا سلسلہ جاری ہے، جس کے باعث لینڈ سلائیڈنگ اور دیگر حادثات کا خطرہ بڑھ گیا ہے۔ بھارت میں بڑے تعمیراتی منصوبوں پر حادثات عام ہیں، تاہم ماہرینِ ماحولیات کا کہنا ہے کہ ہمالیائی خطے میں ضرورت سے زیادہ ترقیاتی منصوبوں کے باعث قدرتی آفات میں اضافہ ہو رہا ہے۔
گزشتہ ماہ بھی بھارت کی شمال مشرقی ریاست سکم میں ایک سرکاری پن بجلی منصوبے کی سرنگ میں کام کرنے والے 20 مزدور ہلاک ہوگئے تھے۔
