وزیراعلیٰ بلوچستان میر سرفراز بگٹی نے سول اسپتال کوئٹہ میں تیزاب گردی کا شکار ہونے والی لیڈی ڈاکٹر ماہ نور ناصر کی بروقت مدد کرنے والے نوجوان عبدالرازق خلجی اور ان کے بھائی کے لیے سرکاری ملازمت کا اعلان کردیا۔
وزیراعلیٰ بلوچستان نے عبدالرازق خلجی سے ملاقات کی اور مشکل کی گھڑی میں متاثرہ لیڈی ڈاکٹر کی مدد کے لیے فوری طور پر آگے بڑھنے پر ان کے جذبۂ انسانیت، ہمت اور بہادری کو سراہا۔
وزیراعلیٰ بلوچستان میر سرفراز بگٹی نے سول اسپتال کوئٹہ میں تیزاب گردی کی شکار لیڈی ڈاکٹر ماہ نور ناصر کی بروقت مدد کرنے والے نوجوان عبدالرازق خلجی اور ان کے بھائی کے لیے سرکاری ملازمت کا اعلان کردیا۔ وزیراعلیٰ نے عبدالرازق خلجی سے ملاقات کے دوران ان کے جذبۂ انسانیت، ہمت اور… pic.twitter.com/P2UlbsqJKT
— PTV News (@PTVNewsOfficial) August 16, 2026
میر سرفراز بگٹی نے کہا کہ مشکل وقت میں دوسروں کی مدد کرنے والے نوجوان معاشرے کے لیے قابلِ تقلید مثال ہیں۔ ایسے افراد نہ صرف انسانی ہمدردی کا عملی مظاہرہ کرتے ہیں بلکہ معاشرے میں دوسروں کی مدد اور خدمت کا جذبہ بھی اجاگر کرتے ہیں۔
وزیراعلیٰ نے عبدالرازق خلجی اور ان کے بھائی کی خدمات کے اعتراف میں انہیں سرکاری ملازمت دینے کا اعلان کرتے ہوئے کہا کہ انسانیت کے لیے مشکل حالات میں کردار ادا کرنے والوں کی حوصلہ افزائی حکومت کی ذمہ داری ہے۔
واضح رہے کہ سول اسپتال کوئٹہ میں لیڈی ڈاکٹر ماہ نور ناصر کو تیزاب گردی کا نشانہ بنایا گیا تھا، جس کے بعد واقعے نے نہ صرف طبی حلقوں بلکہ پورے معاشرے میں تشویش پیدا کردی تھی۔
واقعے کے فوری بعد عبدالرازق خلجی نے انسانی ہمدردی کا مظاہرہ کرتے ہوئے متاثرہ ڈاکٹر کی بروقت مدد کی اور انہیں طبی امداد کی فراہمی میں معاونت کی۔
عبدالرازق خلجی کے اس اقدام کو عوامی سطح پر بھی سراہا گیا، جس کے بعد وزیراعلیٰ بلوچستان نے ان سے ملاقات کرکے ان کی بہادری اور انسان دوستی کو خراج تحسین پیش کیا۔
ملاقات کے دوران عبدالرازق خلجی اور ان کے بھائیوں نے وزیراعلیٰ بلوچستان کا شکریہ ادا کیا اور سرکاری ملازمت کے اعلان پر اظہارِ تشکر کیا۔
