جنوبی کوریا کے وزیر خارجہ چو ہیون نے انکشاف کیا ہے کہ امریکی صدر ڈونلڈ ٹرمپ کی جانب سے مشترکہ فوجی مشقوں کو محدود کرنے کا حکم سیول پر مختلف معاملات میں دباؤ ڈالنے کی کوشش معلوم ہوتا ہے۔
جنوبی کوریا کے وزیر خارجہ چو ہیون نے بدھ کے روز اپنے ایک بیان میں کہا ہے کہ امریکی صدر ڈونلڈ ٹرمپ کی جانب سے مشترکہ فوجی مشقوں میں کمی کا حکم، بنیادی طور پر سیول پر ایران جنگ میں امریکی اقدامات کی حمایت کرنے اور سرمایہ کاری جیسے دیگر حل طلب امور پر دباؤ ڈالنے کے لیے معلوم ہوتا ہے۔
وزیر خارجہ چو کا کہنا تھا ’میرے خیال میں صدر ٹرمپ کے اس پیغام میں جنوبی کوریا سے متعلق کئی زیر التواء مسائل پر دباؤ، شمالی کوریا کے لیے ایک واضح پیغام اور ایران جنگ میں جاری جمود کو توڑنے کی امریکی خواہش شامل ہے۔‘
یہ بھی پڑھیے ٹرمپ کا جنوبی کوریا کے ساتھ مشترکہ فوجی مشقیں کم کرنے کا حکم
وزیر خارجہ نے نشاندہی کی کہ دونوں ممالک کے درمیان کشیدگی کا ایک ممکنہ ذریعہ گزشتہ سال طے پانے والے تجارتی معاہدے کے تحت امریکا میں جنوبی کوریا کی 350 ارب ڈالر کی وعدہ شدہ سرمایہ کاری ہو سکتی ہے۔ جنوبی کوریا نے ابھی تک اس سرمایہ کاری کے منصوبے کی تفصیلات کا باضابطہ اعلان نہیں کیا ہے، تاہم انہوں نے بتایا کہ واشنگٹن نے سیول کو ان مجوزہ منصوبوں کی ایک خاکہ فہرست بھیجی ہے جن پر غور کیا جا سکتا ہے۔
چو ہیون نے مزید وضاحت کرتے ہوئے کہا ’ہم سرمایہ کاری کے منصوبے پر زیادہ تیزی سے پیشرفت اس لیے نہیں کر سکے کیونکہ ہمیں کاروباری افادیت جیسے عوامل کو مدنظر رکھنا تھا اور قانونی مراحل سے گزرنا تھا۔‘
انہوں نے مزید تفصیلات بتائے بغیر کچھ دیگر غیر متوقع مشکلات کا بھی ذکر کیا۔
یہ بھی پڑھیے جنوبی کوریا کی شمالی کوریا کو جنگ کے باضابطہ خاتمے کے لیے مذاکرات کی پیشکش
واضح رہے کہ امریکا میں امریکی مشاركت کو نمایاں طور پر کم کرنے سے متعلق صدر ٹرمپ کے حکم کے بعد جنوبی کوریا اور امریکا نے بدھ کے روز اعلان کیا ہے کہ وہ اپنی سالانہ مشترکہ فوجی مشقوں کی مدت 11 دن سے گھٹا کر 5 دن کر رہے ہیں اور بعض میدانی مشقوں کے دائرہ کار کو بھی محدود کر رہے ہیں۔
دوسری طرف جنوبی کوریا کے وزیر برائے قومی یکجہتی چنگ ڈونگ ینگ نے رائے دی کہ ٹرمپ ان مشقوں کو محدود کر کے ممکنہ طور پر شمالی کوریا کے قائد کم جونگ ان کے ساتھ ایک نئی ملاقات کی راہ ہموار کر رہے ہیں، کیونکہ پیانگ یانگ طویل عرصے سے ان مشقوں پر شدید برہمی کا اظہار کرتا رہا ہے۔
