امریکی ریاست اوریگن میں چوری کی کوشش کے دوران دکان کے مالک کی فائرنگ سے زخمی ہونے والے شخص نے الٹا دکاندار کے خلاف ایک کروڑ ڈالر ہرجانے کا مقدمہ دائر کردیا۔
کینتھ وائلز نامی شخص 6 مارچ 2023 کو پورٹ لینڈ میں واقع ’ٹچ اسٹون گرینائٹ اینڈ ماربل‘ میں مبینہ طور پر چوری کی نیت سے داخل ہوا تھا۔ عدالتی دستاویزات کے مطابق وہ دکان کے گیراج کے خراب دروازے کے ذریعے اندر داخل ہوا اور ایک ڈرل بیگ بھی اٹھا لیا تھا۔
یہ بھی پڑھیں: اسمارٹ چشمے نابینا افراد کی زندگیاں بدل رہے ہیں لیکن شرپسند عناصر یہ سہولت چھیننے کے درپے
وائلز نے عدالت کو بتایا کہ اس وقت وہ بے گھر تھا، شدید سردی اور تھکن کا شکار تھا اور کھانے اور گرم جگہ کی تلاش میں بند دکان میں داخل ہوا۔ اس نے یہ بھی تسلیم کیا کہ اس کا دکان میں داخل ہونا غیر قانونی تھا۔
وائلز کے مطابق دکان کے مالک 73 سالہ جیمز گرانٹ کے سامنے آنے پر صورتحال کشیدہ ہوگئی۔ اس کا دعویٰ ہے کہ اس نے معذرت کرتے ہوئے فرار ہونے کی کوشش کی تاہم گرانٹ نے اس پر کافی کا مگ اور بھاری ٹائلیں پھینکیں۔
یہ بھی پڑھیں: اسمارٹ چشمے نابینا افراد کی زندگیاں بدل رہے ہیں لیکن شرپسند عناصر یہ سہولت چھیننے کے درپے
دوسری جانب جیمز گرانٹ نے عدالت میں مؤقف اختیار کیا کہ اس نے فائرنگ اپنے دفاع میں کی۔ گرانٹ کے مطابق وائلز نے بھاری بولٹ کٹرز سر کے اوپر اٹھائے اور اس کی جانب بڑھا جس پر اس نے تین گولیاں چلائیں۔ فائرنگ سے وائلز کے بازو اور دھڑ پر گولیاں لگیں۔
فائرنگ کے نتیجے میں وائلز کا پھیپھڑا بیٹھ گیا جبکہ دائیں بازو کی ہڈیاں بھی شدید متاثر ہوئیں اور اسے متعدد سرجریوں سے گزرنا پڑا۔
یہ بھی پڑھیں: گرمیوں میں دریائے زرد کے کنارے سیاحت مقبول، نئی شاہراہوں نے سفر آسان بنا دیا
واقعے کے بعد وائلز کو فرسٹ ڈگری چوری اور دھمکی دینے کے جرم میں سزا سنائی گئی جبکہ دکان کے مالک جیمز گرانٹ کے خلاف کوئی فوجداری مقدمہ درج نہیں کیا گیا۔
اب وائلز نے گرانٹ اور ان کی کمپنی کے خلاف دیوانی مقدمہ دائر کرتے ہوئے الزام عائد کیا ہے کہ وہ فرار ہونے کی کوشش کر رہا تھا لیکن اس کے باوجود گرانٹ نے فائرنگ جاری رکھی۔
یہ بھی پڑھیں: کیا ترکیہ کا یہ غار وہی جگہ ہے جہاں ہومر نے اوڈیسی تخلیق کی تھی؟
وائلز نے 50 لاکھ ڈالر معاوضے اور مزید 50 لاکھ ڈالر تعزیری ہرجانے کا مطالبہ کیا ہے۔ مقدمے میں اس نے دکان کے مالک پر مبینہ طور پر حملہ، مارپیٹ، غفلت اور دانستہ ذہنی اذیت پہنچانے کے الزامات عائد کیے ہیں۔
عدالت میں وائلز نے دعویٰ کیا کہ اس نے فائرنگ روکنے کے لیے دکاندار سے بارہا اپیل کی تاہم مبینہ طور پر اسے جواب ملا ’تم مرنے والے ہو‘۔
