سینئر اداکار و ہدایت کار عثمان پیرزادہ نے لاہور کی ثقافت میں آنے والی تبدیلیوں پر گفتگو کرتے ہوئے کہا ہے کہ چھوٹے شہروں سے لاہور منتقل ہونے والے بعض افراد اس شہر کے مزاج اور ثقافتی کردار کو سمجھ نہیں سکے، جس کے باعث وقت کے ساتھ لاہور کی ثقافت متاثر ہوئی۔
حالیہ ٹی وی پروگرام میں گفتگو کرتے ہوئے عثمان پیرزادہ نے لاہور کے قدیم اور نئے رہائشیوں کے درمیان فرق کا ذکر کیا۔ انہوں نے اپنے زمانۂ طالب علمی کو یاد کرتے ہوئے کہا کہ گورنمنٹ کالج میں ان کے کئی ہم جماعت اندرونِ لاہور سے تعلق رکھتے تھے اور وہ اکثر اپنا وقت پرانے شہر میں گزارتے تھے اس لیے اس وقت کسی قسم کی ثقافتی کشمکش محسوس نہیں ہوتی تھی۔
View this post on Instagram
عثمان پیرزادہ کا کہنا تھا کہ میں ہمیشہ سے محسوس کرتا آیا ہوں کہ چھوٹے شہروں سے لاہور آنے والے لوگوں کی وجہ سے کسی حد تک لاہور کی ثقافت کو نقصان پہنچا۔
تاہم انہوں نے واضح کیا کہ بہتر زندگی اور مواقع کی تلاش میں چھوٹے شہروں سے بڑے شہروں کی جانب نقل مکانی میں کوئی برائی نہیں۔ ان کے مطابق مسئلہ اس وقت پیدا ہوا جب بعض افراد لاہور کے مزاج، روایات اور ثقافتی کردار کو سمجھنے میں ناکام رہے۔
یہ بھی پڑھیں: کیا عثمان پیرزادہ کا ڈراما ‘ڈائن’ بھارتی فلم کا چربا ہے؟ اداکار نے بتا دیا
انہوں نے کہا کہ تمام تبدیلیوں کے باوجود لاہور کی بنیادی شناخت آج بھی برقرار ہے اور شہر کی کئی روایات اور طرزِ زندگی اب بھی زندہ ہیں۔
لاہور سے اپنی دیرینہ محبت کا اظہار کرتے ہوئے عثمان پیرزادہ نے کہا کہ وہ اس شہر میں پلے بڑھے ہیں، اسی لیے بیرونِ ملک منتقل ہونے کے متعدد مواقع ملنے کے باوجود وہ کبھی لاہور سے دور رہنے کا تصور نہیں کر سکے۔
یہ بھی پڑھیں: عثمان پیرزادہ اور ثمینہ پیرزادہ نے بھاگ کر شادی کیوں کی؟
انہوں نے کہا کہ جس طرح لوگ بہتر مواقع کے لیے چھوٹے شہروں سے بڑے شہروں کا رخ کرتے ہیں، اسی طرح دنیا کے مختلف ممالک اور شہروں، بالخصوص نیویارک اور لندن، کی جانب بھی نقل مکانی کرتے ہیں، تاہم میں کبھی تصور نہیں کر سکتا تھا کہ لاہور سے دور رہوں۔
عثمان پیرزادہ کو پاکستان کی شوبز انڈسٹری میں اداکار، ہدایت کار، پروڈیوسر اور اسکرین رائٹر کی حیثیت سے پانچ دہائیوں سے زائد عرصے کا تجربہ حاصل ہے۔ انہوں نے گورنمنٹ کالج میں زیرِ تعلیم رہتے ہوئے تھیٹر سے فنی سفر کا آغاز کیا اور 1976 میں پاکستان کی پہلی انگریزی زبان کی فیچر فلم ’Beyond the Last Mountain‘ میں اہم کردار ادا کیا۔
یہ بھی پڑھیں: بلوں سے زیادہ ٹیکس، واپڈا بے ایمانی کر رہا ہے، اداکار عثمان پیرزادہ پھٹ پڑے
بعد ازاں انہوں نے متعدد کامیاب فلموں کی ہدایت کاری، پروڈکشن اور اسکرپٹ رائٹنگ کی، جبکہ 2023 میں پاکستانی فلم اور ٹیلی ویژن کے لیے خدمات کے اعتراف میں انہیں پی ٹی وی نیشنل آئیکون ایوارڈ سے بھی نوازا گیا۔
