انگلینڈ کے آل راؤنڈر ول جیکس اپینڈکس کی کامیاب سرجری کے بعد پاکستان کے خلاف آئندہ ٹیسٹ سیریز سے باہر ہوگئے ہیں۔
یہ بھی پڑھیں: انگلینڈ کا پاکستان کو 171 رنز پر آؤٹ کرنے کے بعد پہلے ٹیسٹ میں محتاط آغاز
انگلینڈ اینڈ ویلز کرکٹ بورڈ کے مطابق ول جیکس کے اپینڈکس کو سرجری کے ذریعے نکال دیا گیا ہے اور اب ان کی صحت یابی کی نگرانی کی جائے گی۔
انگلینڈ کے بورڈ نے ان کی مسابقتی کرکٹ میں واپسی کے لیے کوئی حتمی مدت نہیں بتائی تاہم امکان ہے کہ وہ ستمبر میں سری لنکا کے خلاف انگلینڈ کی وائٹ بال سیریز کے لیے دستیاب ہوسکتے ہیں۔
ول جیکس کی انجری کی یہ پیشرفت ایسے وقت میں سامنے آئی ہے جب انگلینڈ کو رواں سال پاکستان، سری لنکا اور انگلینڈ پر مشتمل ایک روزہ سہ ملکی سیریز میں بھی شرکت کرنا ہے۔
مزید پڑھیے: پاکستانی کھلاڑیوں کو نظر انداز کرنے کی غلطی نہ کریں، انگلینڈ کرکٹ بورڈ نے دی ہنڈرڈ فرنچائزز کو خبردار کردیا
یہ سہ ملکی سیریز 18 سے 31 اکتوبر تک راولپنڈی اور لاہور میں کھیلی جائے گی اور تینوں ٹیموں کے لیے آئندہ بین الاقوامی مقابلوں سے قبل اہم تیاری کا موقع ہوگی۔
سیریز کا آغاز 18 اکتوبر کو راولپنڈی کرکٹ اسٹیڈیم میں پاکستان اور سری لنکا کے میچ سے ہوگا جبکہ پاکستان 20 اکتوبر کو اسی میدان میں انگلینڈ کے مدمقابل ہوگا۔
22 اکتوبر کو راولپنڈی میں سری لنکا اور انگلینڈ آمنے سامنے ہوں گے جس کے بعد سیریز کے میچز لاہور منتقل ہوجائیں گے۔
مزید پڑھیں: انگلینڈ کے خلاف ٹیسٹ سیریز سے قبل سعود شکیل کا اعتماد بحال، وارم اپ میچ میں سینچری جڑ دی
25 اکتوبر کو قذافی اسٹیڈیم لاہور میں پاکستان اور انگلینڈ، جبکہ 27 اکتوبر کو پاکستان اور سری لنکا کے درمیان مقابلہ ہوگا۔ 29 اکتوبر کو سری لنکا اور انگلینڈ ایک بار پھر مدِمقابل ہوں گے، جبکہ سہ ملکی سیریز کا فائنل 31 اکتوبر کو اسی میدان میں کھیلا جائے گا۔
انگلینڈ کو اسپن آل راؤنڈر کے متبادل کی تلاش
ول جیکس پاکستان کے خلاف ٹیسٹ سیریز کے لیے انگلینڈ کی ٹیم میں جگہ بنانے کے امیدواروں میں شامل تھے۔ ان کی عدم دستیابی سے انگلینڈ کے پاس اسپن بولنگ آل راؤنڈر کے آپشنز محدود ہوگئے ہیں۔
ان کی غیر موجودگی میں ڈین لارنس کو چھٹے نمبر پر بیٹنگ کے لیے زیر غور لایا جا سکتا ہے۔
انگلینڈ پہلے پاکستان کے خلاف ٹیسٹ سیریز کھیلے گا جس کے بعد ٹیم رواں سال کے آخر میں وائٹ بال کرکٹ کے شیڈول پر توجہ مرکوز کرے گی۔
پاکستان، انگلینڈ اور سری لنکا کی سہ ملکی سیریز کا شیڈول
18 اکتوبر: پاکستان بمقابلہ سری لنکا — راولپنڈی کرکٹ اسٹیڈیم
20 اکتوبر: پاکستان بمقابلہ انگلینڈ — راولپنڈی کرکٹ اسٹیڈیم
22 اکتوبر: سری لنکا بمقابلہ انگلینڈ — راولپنڈی کرکٹ اسٹیڈیم
25 اکتوبر: پاکستان بمقابلہ انگلینڈ — قذافی اسٹیڈیم، لاہور
27 اکتوبر: پاکستان بمقابلہ سری لنکا — قذافی اسٹیڈیم، لاہور
29 اکتوبر: سری لنکا بمقابلہ انگلینڈ — قذافی اسٹیڈیم، لاہور
31 اکتوبر: سہ ملکی سیریز کا فائنل — قذافی اسٹیڈیم، لاہور
