بھارتی ریاست راجستھان میں سرکاری اسکول کے معائنے کے لیے جانے والی ’کاکروچ جنتا پارٹی‘ (سی جے پی) کی ٹیم کو مبینہ طور پر مشتعل افراد نے گھیر لیا، حملہ کیا اور گاؤں سے واپس جانے پر مجبور کردیا۔
واقعہ جے پور کے باگرو اسمبلی حلقے کے رام پورہ کنور پورہ گاؤں میں پیش آیا، جہاں سی جے پی کے شریک بانی آشوتوش رانکا کی قیادت میں ٹیم سرکاری پرائمری اسکول کا معائنہ کرنے پہنچی تھی۔
مزید پڑھیں:حکومت سے کامیاب مذاکرات، ’کاکروچ جنتا پارٹی‘ نے احتجاج ختم کرنے کا اعلان کردیا
رپورٹ کے مطابق مشتعل ہجوم نے سی جے پی کارکنوں کو روکنے کے ساتھ ان کے خلاف نعرے لگائے اور انہیں ’اربن نکسل‘، ’ملک دشمن‘ اور ’پاکستانی‘ قرار دیا۔ بعض افراد نے کارکنوں کو تشدد کا نشانہ بھی بنایا، جس کے بعد ٹیم اسکول کا معائنہ کیے بغیر واپس چلی گئی۔
سی جے پی رہنماؤں نے الزام عائد کیا ہے کہ حملے کے پیچھے بھارتیہ جنتا پارٹی (بی جے پی) سے وابستہ افراد تھے۔ آشوتوش رانکا کے مطابق ٹیم کو گاؤں کے لوگوں نے اسکول کا معائنہ کرنے کے لیے بلایا تھا، تاہم مقامی بی جے پی رہنماؤں نے مبینہ طور پر باہر سے افراد بلا کر حملہ کرایا۔
Rajasthan: A Cockroach Janta Party (CJP) team, which was visiting a government school in Rampura Kanwarpura in Jaipur district, attacked by the people. The team alleges that they were attacked by BJP’s people at the spot. pic.twitter.com/Juhx5Jp5I0
— Shakeel Yasar Ullah (@yasarullah) August 21, 2026
رانکا نے دعویٰ کیا کہ حملے میں ان کی شرٹ پھاڑ دی گئی، ایک خاتون کارکن کو بھی تشدد کا نشانہ بنایا گیا، گاڑیوں کو نقصان پہنچایا گیا اور ایک کارکن کا ہاتھ فریکچر ہوگیا۔ انہوں نے میڈیا سے اپیل کی کہ واقعے کا ذمہ دار گاؤں کے رہائشیوں کو نہ ٹھہرایا جائے۔
سی جے پی کے مطابق وہ ’اسکول ٹھیک کرو‘ مہم کے تحت راجستھان کے سرکاری اسکولوں کی حالت کا جائزہ لے رہی ہے۔ پارٹی کا کہنا ہے کہ مذکورہ اسکول میں کئی برس سے تعلیمی سرگرمیاں مویشیوں کے باڑے میں جاری ہیں۔
مزید پڑھیں:بھارت میں ’کاکروچ جنتا پارٹی‘ کی دھوم، نوجوانوں نے مودی کے ہندو مسلم بیانیے کو چیلنج کردیا
واقعے پر راجستھان اسمبلی میں بھی ہنگامہ ہوا، جہاں بی جے پی اور کانگریس نے ایک دوسرے کو ذمہ دار ٹھہرایا۔ کانگریس کے ریاستی صدر گووند سنگھ ڈوتاسرا نے بی جے پی پر الزام عائد کیا، جبکہ ریاستی وزیر داخلہ جواہر سنگھ بیڈم نے دعویٰ کیا کہ کانگریس، سی جے پی کی آڑ میں ریاست میں انتشار پیدا کررہی ہے۔
دیہاتیوں نے سی جے پی کے الزامات کی تردید کرتے ہوئے کہا ہے کہ انہوں نے ٹیم کو اسکول میں داخل ہونے سے روکا تھا۔ واقعے کی تحقیقات اور ذمہ داروں کے خلاف کارروائی سے متعلق مزید تفصیلات سامنے آنا باقی ہیں۔
