سویڈن کے وسطی علاقے میں ایک حملہ آور نے اسکول میں داخل ہوکر تلوار کے وار سے کئی افراد کو زخمی کردیا۔
فاغیرستا میونسپلٹی کی جانب سے جاری بیان میں کہا گیا ہے کہ پولیس نے مشتبہ حملہ آور کو حراست میں لے لیا ہے۔
حکام نے بتایا کہ تلوار سے مسلح حملہ آور برینل اسکول میں داخل ہوا اور متعدد افراد کو زخمی کیا۔
یہ بھی پڑھیں:توہین قرآن کی دوبارہ اجازت دینے پر بغداد میں سویڈن کا سفارتخانہ جلا دیا گیا
سویڈش پولیس نے کہا کہ اسے فاغیرستا کے ایک اسکول میں جاری مہلک تشدد کے واقعے کی اطلاع موصول ہوئی، جس کے بعد کارروائی کرتے ہوئے ایک شخص کو حراست میں لے لیا گیا۔
میونسپلٹی نے فوری طور پر یہ نہیں بتایا کہ حملے میں کتنے افراد زخمی ہوئے، تاہم خبر رساں ادارے روئٹرز کے مطابق برینل اسکول میں تقریباً 450 طلبہ زیرِ تعلیم ہیں، جن کی عمریں 16 سے 20 سال کے درمیان ہیں۔
پولیس، ایمبولینسیں اور ایک ہیلی کاپٹر اسکول پہنچ گئے، جبکہ حکام نے عمارت کی تلاشی بھی شروع کردی۔ علاقے کے دیگر اسکولوں کو بھی حفاظتی طور پر بند کردیا گیا۔
یہ بھی پڑھیں: ناروے میں پولیس نے ترک سفارت خانہ کے باہر اسلام مخالف مظاہرے پر پابندی لگادی
پولیس نے کہا کہ مختلف وسائل اور اہلکاروں کی مدد سے کارروائی جاری ہے۔ عوام سے اپیل کی گئی ہے کہ وہ سڑکوں پر لگائی گئی رکاوٹوں کا احترام کریں اور پولیس کی ہدایات پر عمل کریں۔
سویڈن کے وزیراعظم اولف کرسٹرسن نے واقعے کو ‘سنگین واقعہ’ قرار دیتے ہوئے کہا کہ حکام کو ابھی معلوم نہیں کہ حملے کے پسِ پردہ کیا محرکات تھے۔
انہوں نے کہا کہ ابھی یہ معلوم نہیں کہ اس کارروائی کے پیچھے کیا وجہ ہے، تاہم پولیس انتہائی تندہی سے کام کر رہی ہے۔
