پنجاب حکومت نے صوبے کے تمام بڑے سرکاری اسپتالوں کے اطراف فائر ہائیڈرنٹس کی تنصیب کا فیصلہ کرتے ہوئے متعلقہ اداروں کو اقدامات کی ہدایت کردی۔
ترجمان محکمہ ہاؤسنگ پنجاب کے مطابق فائر ہائیڈرنٹس کی تنصیب کے لیے پہلے مرحلے میں صوبے کے 57 بڑے سرکاری اسپتالوں کی فہرست تیار کرلی گئی ہے۔
یہ بھی پڑھیں: پمز اسپتال میں آتشزدگی کے باعث 14 نومولود دم گھٹنے سے جاں بحق، والدین کا غفلت کا الزام
ترجمان نے بتایا کہ واسا کو اسپتالوں کے اطراف فائر ہائیڈرنٹس کے لیے موزوں اور اہم مقامات کی نشاندہی کرنے کے ساتھ ساتھ ان کی تنصیب کا ٹاسک بھی سونپ دیا گیا ہے۔
واضح رہے کہ فیصلہ اسلام آباد کے پمز اسپتال میں بدھ کی صبح گائنی وارڈ کی نرسری میں آتشزدگی کے واقعے کے بعد سامنے آیا ہے، جس میں 14 نومولود بچے جھلس کر جاں بحق ہوگئے تھے۔
مزید پڑھیں: اسلم غوری سیکریٹری صحت کے عہدے سے فارغ، محمد محمود کو اضافی چارج مل گیا
دوسری جانب سی ڈی اے کے فائر بریگیڈ ڈیپارٹمنٹ کی رپورٹ میں پمز اسپتال میں آگ سے بچاؤ اور انسانی جانوں کے تحفظ کے لیے کیے گئے انتظامات کو ناکافی قرار دیا گیا ہے۔
حکام کے مطابق سرکاری اسپتالوں کے اطراف فائر ہائیڈرنٹس کی دستیابی سے ہنگامی صورت حال میں فائر بریگیڈ کو فوری طور پر پانی حاصل کرنے اور امدادی کارروائیوں میں مدد مل سکے گی۔
