معروف ٹیکنالوجی کمپنی ایپل نے رواں سال کے سب سے بڑے آئی فون ایونٹ کی تاریخ کا اعلان کردیا ہے جو 9 ستمبر کو ایپل پارک میں منعقد ہوگا۔
’سرپرائز اینڈ شائن‘ کے عنوان سے ہونے والے اس ایونٹ میں کمپنی کی جانب سے آئی فون 18 پرو سیریز کے ساتھ اپنے پہلے فولڈ ایبل آئی فون کی رونمائی متوقع ہے۔
یہ بھی پڑھیں: کیا ایپل آئی فون ایئر 2 بڑا سرپرائز دینے جارہا ہے؟ لانچ اور نئے فیچرز سے متعلق اہم تفصیلات
رپورٹس کے مطابق ایپل کا پہلا فولڈ ایبل آئی فون کتاب کی طرح کھلنے والے ڈیزائن کے ساتھ پیش کیا جاسکتا ہے۔ اس کی بیرونی اسکرین تقریباً 5.5 انچ جبکہ کھولنے پر اندرونی ڈسپلے تقریباً 7.8 انچ ہونے کا امکان ہے جو سائز میں آئی پیڈ منی کے قریب ہوگا۔
ذرائع کے مطابق فولڈ ایبل آئی فون کا نام ’آئی فون الٹرا‘ ہوسکتا ہے تاہم ایپل نے ابھی تک اس نام یا ڈیوائس کی حتمی خصوصیات کی باضابطہ تصدیق نہیں کی۔ رپورٹس میں یہ بھی دعویٰ کیا گیا ہے کہ فون انتہائی پتلا ہوگا اور اس میں فیس آئی ڈی کے بجائے سائیڈ بٹن میں ٹچ آئی ڈی دیے جانے کا امکان ہے۔
یہ بھی پڑھیں: آئی فون صارفین کیلئے خوشخبری، آئی او ایس 26 کے پوشیدہ فیچرز سامنے آگئے
فولڈ ایبل آئی فون کی ممکنہ قیمت بھی صارفین کے لیے اہم موضوع بن گئی ہے۔ مختلف رپورٹس کے مطابق اس کی ابتدائی قیمت تقریباً 2 ہزار ڈالر ہوسکتی ہے جبکہ بعض اعلیٰ کنفیگریشنز کی قیمت 2500 ڈالر یا اس سے زیادہ تک پہنچنے کا امکان ظاہر کیا گیا ہے۔
ایپل کے اس نئے فون کی آمد سے کمپنی فولڈ ایبل اسمارٹ فونز کی مارکیٹ میں براہ راست سام سنگ کا مقابلہ کرے گی جو اس شعبے میں کئی برس سے نمایاں حیثیت رکھتا ہے۔ تجزیہ کاروں کے مطابق ایپل کی انٹری سے فولڈ ایبل فونز میں صارفین کی دلچسپی مزید بڑھ سکتی ہے۔
یہ بھی پڑھیں: ایپل نے فولڈ ایبل آئی فون کی لانچنگ کیوں مؤخر کی؟
ایونٹ میں آئی فون 18 پرو اور آئی فون 18 پرو میکس کی رونمائی بھی متوقع ہے جبکہ رپورٹس کے مطابق معیاری آئی فون 18 کی لانچ بعد میں 2027 میں ہوسکتی ہے۔ اس کے علاوہ نئی ایپل واچز اور دیگر اسمارٹ ہوم مصنوعات بھی متعارف کرائے جانے کا امکان ہے۔
یہ ایونٹ ایپل کے لیے اس لحاظ سے بھی اہم ہوگا کہ یکم ستمبر کو جان ٹرنَس کمپنی کے نئے چیف ایگزیکٹو آفیسر کا عہدہ سنبھالیں گے اور یہ ان کی قیادت میں ایپل کا پہلا بڑا پروڈکٹ لانچ ہوگا۔
