چین نے اسلام آباد میں ہنگامی حالات سے نمٹنے کی صلاحیت بہتر بنانے کے لیے 3 ارب روپے مالیت کی 21 جدید فائر اور ریسکیو گاڑیاں دینے کا اعلان کردیا ہے۔
چینی سفارتخانے کے مطابق جدید گاڑیوں کا بیڑا رواں ماہ اسلام آباد پہنچے گا، جس میں 88 میٹر بلند عمارتوں میں امدادی کارروائیوں کے لیے خصوصی گاڑی بھی شامل ہے۔
یہ بھی پڑھیں: پمز آتشزدگی: 1122 پر کال موصول ہوتے ہی ریسکیو فائر بریگیڈ کی گاڑی 6 منٹ میں اسپتال کیسے پہنچی؟
چینی سفارتخانے کا کہنا ہے کہ جدید گاڑیوں سے دارالحکومت میں ہنگامی حالات سے نمٹنے اور بلند عمارتوں میں امدادی کارروائیوں کی صلاحیت میں نمایاں اضافہ ہوگا۔
چینی سفارتخانے نے کہا کہ یہ تعاون پاکستان اور چین کے ہر موسم میں قائم رہنے والے تزویراتی تعاون اور دونوں ممالک کی جانب سے عوام کے تحفظ کے عزم کی عکاسی کرتا ہے۔
Reinforcing our shared commitment to public safety and disaster resilience. China is gifting a modern fleet of 21 fire & rescue vehicles valued at *PKR 3 Billion* to upgrade Islamabad’s emergency response infrastructure.
Arriving this September, the fleet features an advanced 88m…— Chinese Emb Pakistan (@CathayPak) September 1, 2026
چین کی جانب سے فائر اور ریسکیو گاڑیوں کا اعلان اسلام آباد کے پاکستان انسٹی ٹیوٹ آف میڈیکل سائنسز کے زچہ و بچہ اسپتال کے نومولود بچوں کے وارڈ میں آتشزدگی کے واقعے کے بعد سامنے آیا ہے، جس میں 14 نومولود بچے جاں بحق ہوگئے تھے۔
یہ بھی پڑھیں: ایچ نائن بازار آتشزدگی: ابتدائی آگ 2 اسٹالز سے بھڑکی، اسٹالز کو گودام بنانے اور فائر سیفٹی میں غفلت کا انکشاف
واقعے کے بعد وزیراعظم شہباز شریف نے تحقیقات کی روشنی میں آٹھ افراد کے خلاف کارروائی کی منظوری دی تھی، جن میں اسپتال کے ایگزیکٹو ڈائریکٹر بھی شامل تھے۔
چین اور پاکستان کے درمیان حالیہ برسوں میں ہنگامی امداد، سلامتی اور دیگر شعبوں میں تعاون میں اضافہ ہوا ہے، جبکہ دونوں ممالک نے تزویراتی شراکت داری مزید مضبوط بنانے کے عزم کا بھی اظہار کیا ہے۔
