وفاقی وزیر خزانہ و محصولات سینیٹر محمد اورنگزیب نے پاکستان ایگریکلچرل اسٹوریج اینڈ سروسز کارپوریشن (پاسکو) اور یوٹیلیٹی اسٹورز کارپوریشن (یو ایس سی) کی بندش کے عمل میں پیشرفت کا جائزہ لیتے ہوئے باقی ماندہ اقدامات جلد مکمل کرنے کی ہدایت کی ہے۔
وفاقی وزیر خزانہ و محصولات سینیٹر محمد اورنگزیب کی زیر صدارت اجلاس ہوا جس میں پاسکو اور یوٹیلیٹی اسٹورز کارپوریشن کی بندش کے عمل پر اب تک ہونے والی پیشرفت کا جائزہ لیا گیا اور اس عمل کو مکمل کرنے کے لیے درکار باقی اقدامات پر غور کیا گیا۔
مزید پڑھیں: یوٹیلیٹی اسٹورز کارپوریشن آج سے بند، ملازمین کے لیے 28 ارب کا پیکج منظور
اجلاس میں تفصیلی بریفنگ کے ذریعے یوٹیلیٹی اسٹورز کارپوریشن کی بندش کے عمل میں اب تک ہونے والی پیش رفت سے آگاہ کیا گیا۔
بریفنگ میں منظور شدہ ملازمین کے سیورنس پیکیج پر عملدرآمد، تصدیق شدہ وینڈرز کے واجبات کی ادائیگی، اسٹاک کی واپسی اور تلفی جبکہ اثاثوں اور جائیدادوں کے انتظام سے متعلق اقدامات شامل تھے۔
اجلاس کو بتایا گیا کہ ملازمین کو ادائیگیوں اور تصدیق شدہ واجبات کی ادائیگی کے معاملے میں نمایاں پیشرفت ہوئی ہے جبکہ اس حوالے سے ضروری آڈٹ اور تصدیقی نظام بھی موجود ہیں۔
اجلاس کو ملازمین اور دیگر معاملات کی مناسب شناخت اور تصدیق کے لیے کیے گئے اقدامات سے بھی آگاہ کیا گیا، جن میں بائیومیٹرک تصدیق اور معاون دستاویزات کی جانچ شامل ہے۔
یوٹیلیٹی اسٹورز کے واجبات اور اسٹاک کی صورتحال
اجلاس کو بتایا گیا کہ وینڈرز کے واجبات کی ادائیگی میں بھی خاطر خواہ پیشرفت ہوئی ہے، اور تصدیق کے بعد کچھ ادائیگیاں کی جا چکی ہیں۔
اجلاس میں یوٹیلیٹی اسٹورز کی بندش کے بعد اسٹاک کی صورتحال کا بھی جائزہ لیا گیا۔
اجلاس کو بتایا گیا کہ برانڈڈ اور دیگر اشیائے خورونوش کی بڑی مقدار واپس کردی گئی یا مقررہ طریقہ کار کے تحت تلف کردی گئی ہے، جبکہ باقی ماندہ اسٹاک پر بھی مقررہ طریقہ کار کے مطابق کارروائی جاری ہے۔
یوٹیلیٹی اسٹورز کے ریکس اور دیگر منقولہ اثاثوں کی نیلامی پر ہونے والی پیشرفت کا بھی جائزہ لیا گیا۔ آئی ٹی آلات اور گاڑیوں کی صورتحال پر بھی غور کیا گیا اور بتایا گیا کہ ان کے تصرف یا منتقلی کے لیے آڈٹ اور تصدیق کا عمل جاری ہے۔
یوٹیلیٹی اسٹورز کی جائیدادوں اور قانونی مقدمات کا جائزہ
اجلاس میں یوٹیلیٹی اسٹورز کارپوریشن کی جائیدادوں اور متعلقہ معاملات کا بھی جائزہ لیا گیا۔ اثاثوں کی فروخت یا منتقلی میں سہولت کے لیے مناسب انتظامات کی ضرورت پر غور کیا گیا۔
وزیر خزانہ نے یوٹیلیٹی اسٹورز کارپوریشن سے متعلق جاری عدالتی مقدمات کا بھی نوٹس لیا اور مقدمات کے انتظام اور حل کے لیے کی جانے والی کوششوں کو سراہا۔
انہوں نے زور دیا کہ یوٹیلیٹی اسٹورز کی بندش کے عمل کے ساتھ ساتھ قانونی، مالی اور انتظامی تقاضوں کو بھی مکمل کیا جائے۔
پاسکو کی بندش کے عمل پر بھی پیشرفت کا جائزہ
اجلاس میں پاسکو کی بندش کے عمل میں ہونے والی پیشرفت کا بھی جائزہ لیا گیا، جس میں اسٹاک کی صورتحال اور باقی ماندہ کام مکمل کرنے کے لیے درکار انتظامات شامل تھے۔
کمیٹی نے مختلف صوبوں میں موجود پاسکو کے اسٹاک سے متعلق امور پر بھی تبادلہ خیال کیا۔ اجلاس کو بتایا گیا کہ متعلقہ صوبوں کی ضروریات اور حالات کو مدنظر رکھتے ہوئے اسٹاک کی منتقلی کے لیے انتظامات کیے جا رہے ہیں۔
وزیر خزانہ سینیٹر محمد اورنگزیب نے صوبائی حکام کے ساتھ قریبی رابطہ کاری کی اہمیت پر زور دیا تاکہ یہ معاملات مجموعی بندش کے عمل میں تاخیر کا سبب نہ بنیں۔
عوامی وسائل کے تحفظ اور شفافیت پر زور
وزیر خزانہ نے بندش کے عمل میں پیشرفت برقرار رکھنے اور باقی ماندہ کام مربوط انداز میں مکمل کرنے کی اہمیت پر زور دیا۔
انہوں نے واضح کیاکہ تمام ذمہ داریاں واضح اور عملی ٹائم لائنز کے ساتھ طے کی جائیں۔
مزید پڑھیں: وفاقی کابینہ نے یوٹیلیٹی اسٹورز کارپوریشن کو تحلیل کرنے کی منظوری دے دی
سینیٹر محمد اورنگزیب نے کہاکہ مقصد یہ ہونا چاہیے کہ بندش کے عمل کو منطقی انجام تک پہنچایا جائے، عوامی وسائل کا تحفظ یقینی بنایا جائے اور ہر مرحلے پر شفافیت برقرار رکھی جائے۔
اجلاس میں وفاقی سیکریٹری وزارت قومی غذائی تحفظ و تحقیق، وفاقی سیکریٹری وزارت صنعت و پیداوار، پاسکو اور یوٹیلیٹی اسٹورز کارپوریشن کے نمائندوں سمیت متعلقہ وزارتوں اور ڈویژنز کے سینیئر حکام نے شرکت کی۔
