ڈیرہ غازی خان کے قبائلی علاقوں اور کوہِ سلیمان میں طوفانی بارشوں کے بعد آنے والے شدید سیلابی ریلوں نے سخی سرور اور ملحقہ آبادیوں میں تباہی مچاتے ہوئے بنیادی نظامِ زندگی کو مکمل طور پر درہم برہم کر دیا ہے۔
کوہِ سلیمان کے پہاڑی سلسلہ سے نکلنے والے سیلابی ریلے سخی سرور اور گرد و نواح کے میدانی علاقوں تک پھیل چکے ہیں۔
یہ بھی پڑھیں:اسلام آباد سمیت بالائی علاقوں میں شدید بارشیں، شمالی علاقہ جات میں گلیشیائی جھیلیں پھٹنے کا خدشہ
تیز رفتار برسات کے پانی اور طغیانی کے باعث تمام اہم راستے اور پُلدیاں زیرِ آب آ کر بند ہو چکی ہیں، جبکہ وسیع رقبے پر پھیلی زرعی زمینیں اور تیار فصلیں پانی میں ڈوب کر شدید متاثر ہوئی ہیں۔
آبادیاں محصور اور شہریوں کی مشکلات
پہاڑی نالوں کا پانی نچلے علاقوں کے گھروں اور گلیوں میں داخل ہو گیا ہے، جس سے قبائلی مکین اپنے گھروں میں محصور ہو کر رہ گئے ہیں۔
مواصلاتی نظام کی معطلی اور سڑکوں کی بندش کے باعث مقامی آبادی کو خوراک، پینے کے صاف پانی اور دیگر ضروریاتِ زندگی تک رسائی میں سخت مشکلات درپیش ہیں۔
اس ناگہانی سیلابی صورتحال نے صوبائی اور مقامی انتظامیہ کی مون سون کے لیے کی گئی پیشگی تدابیر اور تیاریوں کے دعوؤں کا پول کھول دیا ہے۔
مزید پڑھیں:موسلا دھار بارشیں، مختلف شہر زیرِ آب، تاجروں کو کروڑوں کا نقصان
متاثرہ علاقوں میں ہنگامی امداد کی عدم دستیابی پر شہریوں میں گہری تشویش پائی جاتی ہے، جبکہ بارشوں کا سلسہ جاری رہنے کی صورت میں مزید نقصان کا خدشہ ظاہر کیا جا رہا ہے۔
