بھارت میں وزیر اعظم نریندر مودی کے ناقد معروف یوٹیوبر دھرو راٹھی کو دہلی میں کاکروچ جنتا پارٹی (سی جے پی) کے احتجاج سے قبل گروگرام میں ان کی رہائش گاہ سے حراست میں لے لیا گیا۔ بھارتی میڈیا این ڈی ٹی وی کے مطابق پولیس اہلکار ہفتے کی صبح سیکٹر 56 میں واقع ان کے گھر پہنچے اور انہیں حراست میں لے لیا۔
پولیس ذرائع کے مطابق تقریباً 50 اہلکاروں پر مشتمل ٹیم دھرو راٹھی کی رہائش گاہ پہنچی۔ وہ دہلی کے جنتر منتر پر چیف الیکشن کمشنر گیانیش کمار کے خلاف مجوزہ احتجاج میں شرکت کے لیے آئے تھے۔ انہوں نے جمعے کی شام سماجی رابطے کی ویب سائٹ ایکس پر جاری ویڈیو میں احتجاج میں شرکت کا اعلان کیا تھا۔
#BREAKING | YouTuber Dhruv Rathee detained by Delhi Police ahead of CJP protest: Sources https://t.co/KJR0XojcG8@TanushkaDutta Reports. pic.twitter.com/CEyEy9sDKq
— NDTV (@ndtv) October 10, 2026
کاکروچ جنتا پارٹی نے دھرو راٹھی کی حراست پر ردعمل دیتے ہوئے ان کی فوری رہائی کا مطالبہ کیا۔ پارٹی کے قانونی شعبے کی سربراہ رتنا سنگھ نے بھی ویڈیو بیان میں دعویٰ کیا کہ پولیس نے انہیں گھر پر روکنے کی کوشش کی اور ان کی گاڑی کو گھیر لیا، تاہم انہیں حراست میں لیے جانے کی صورت حال واضح نہیں کی گئی۔
این ڈی ٹی وی کے مطابق دھرو راٹھی رواں ہفتے جرمنی سے بھارت پہنچے تھے اور 8 اکتوبر کو بنگلورو میں سی جے پی کے احتجاج میں بھی شریک ہوئے تھے۔
دہلی پولیس نے اس سے قبل سیکیورٹی خدشات اور ضابطہ جاتی تقاضوں کا حوالہ دیتے ہوئے احتجاج کی اجازت دینے سے انکار کر دیا تھا۔ احتجاج کے پیش نظر دارالحکومت میں سیکیورٹی سخت کر دی گئی ہے۔
یہ بھی پڑھیں:مودی حکومت کے لیے ایک اور پریشانی، معروف یوٹیوبر دھرو راٹھی حکومت مخالف احتجاج میں شرکت کے لیے بھارت پہنچ گئے
رپورٹ کے مطابق 400 سے زائد افراد کو رات کے دوران حراست میں لیا گیا، متعدد ٹرینیں منسوخ کی گئیں اور کئی میٹرو اسٹیشن بند کیے گئے۔
احتجاج کے موقع پر امن و امان برقرار رکھنے کے لیے پولیس اور مرکزی مسلح فورسز کے 20 ہزار سے زائد اہلکار تعینات کیے جانے کی اطلاع بھی دی گئی ہے۔
