قومی اسمبلی کی سرکاری نمبر پلیٹ والی گاڑی کو ٹریفک حادثہ پیش آنے کے معاملے پر اسپیکر قومی اسمبلی سردار ایاز صادق نے نوٹس لے لیا، جبکہ حادثے میں گاڑی کو پہنچنے والے نقصان اور غیر مجاز ڈرائیور کی جانب سے سرکاری گاڑی استعمال کیے جانے کا معاملہ اہمیت اختیار کر گیا ہے۔
ذرائع کے مطابق قومی اسمبلی کی ملکیتی گاڑی کو یہ حادثہ قومی اسمبلی کی قائمہ کمیٹی برائے داخلہ کے چیئرمین اور اسلام آباد سے رکن قومی اسمبلی راجا خرم نواز کے بیٹے کو پیش آیا، جس کے نتیجے میں سرکاری گاڑی تباہ ہوگئی۔
ذرائع کا کہنا ہے کہ اسپیکر قومی اسمبلی سردار ایاز صادق نے واقعے کا نوٹس لیتے ہوئے سرکاری گاڑی کو پیش آنے والے حادثے کے معاملے پر توجہ دی ہے۔
حادثے کے بعد قومی اسمبلی کے حکام نے قائمہ کمیٹی برائے داخلہ کے چیئرمین راجا خرم نواز سے رابطہ کیا اور سرکاری گاڑی کو پہنچنے والے نقصان سمیت واقعے سے متعلق معاملات پر بات چیت کی۔
ذرائع کے مطابق راجا خرم نواز نے حادثے کے بعد معاملہ حل کرنے کے لیے کوششیں شروع کیں اور قومی اسمبلی حکام کو یقین دہانی کرائی کہ وہ حادثے میں تباہ ہونے والی سرکاری گاڑی کی مرمت اپنے خرچ پر کروائیں گے۔
انہوں نے سرکاری گاڑی کی مرمت پر آنے والے تمام اخراجات ذاتی طور پر برداشت کرنے کی یقین دہانی بھی کرائی ہے۔
ذرائع کا کہنا ہے کہ حادثے کے بعد یہ سوال بھی اہمیت اختیار کر گیا ہے کہ قومی اسمبلی کی ملکیت سرکاری گاڑی ایک غیر مجاز ڈرائیور کے زیر استعمال کیسے آئی اور اسے گاڑی چلانے کی اجازت کس نے دی تھی؟
قومی اسمبلی کی سرکاری گاڑی کے استعمال، ڈرائیونگ کی اجازت اور حادثے کے نتیجے میں ہونے والے نقصان سمیت معاملے کے مختلف پہلوؤں پر توجہ مرکوز کی جا رہی ہے۔
