واٹس ایپ نے آئی فون صارفین کے لیے نیا مصنوعی ذہانت کا فیچر متعارف کرایا ہے، جس کی مدد سے صارفین اپنی چھوٹی یا مربع تصاویر کو اسٹیٹس کی پوری اسکرین پر لگا سکیں گے، اس کے لیے کسی دوسری ایپ کی ضرورت بھی نہیں ہوگی۔
دی نیوز کے مطابق میٹا اے آئی اس فیچر کے ذریعے تصویر کے اردگرد کا منظر خود تیار کرے گا، تاکہ تصویر موبائل کی پوری اسکرین پر نظر آئے اور اوپر یا نیچے سیاہ جگہ باقی نہ رہے۔
یہ بھی پڑھیں: واٹس ایپ کا نیا فیچر متعارف، پیغام میں موجود نمبر سے کال، تاریخ سے ایونٹ اور پتے سے مقام تلاش کرنا ممکن
اس فیچر کو استعمال کرنے کے لیے صارفین کو واٹس ایپ میں موجود تصویر کھول کر ڈرائنگ ایڈیٹر میں جانا ہوگا، جہاں تصویر کو اسکرین کے مطابق بنانے کا نیا اختیار ملے گا۔
میٹا اے آئی تصویر کو صرف بڑا نہیں کرے گا بلکہ اس کے کناروں پر موجود منظر کو دیکھ کر مزید حصہ تیار کرے گا، تاکہ نئی جگہ اصل تصویر کا ہی حصہ محسوس ہو۔
رپورٹ کے مطابق اگر اصل تصویر کے کناروں پر منظر واضح ہو تو اے آئی بہتر نتیجہ دے سکے گا، جبکہ دھندلی یا خالی جگہوں والی تصاویر میں نتائج اتنے اچھے نہیں ہوں گے۔
یہ بھی پڑھیں: واٹس ایپ کے گروپ چیٹس کے لیے 4 نئے فیچرز متعارف، صارفین کو کیا سہولت ملے گی؟
واٹس ایپ تبدیل شدہ تصویر خودکار طور پر کسی کو نہیں بھیجے گا۔ صارف چاہے تو واپس اصل تصویر پر جاسکتا ہے یا دوبارہ کوشش کرکے تصویر کا نیا انداز حاصل کرسکتا ہے۔
اس فیچر سے خاص طور پر ان صارفین کو فائدہ ہوگا جو مربع یا افقی تصاویر اسٹیٹس پر لگاتے ہیں اور تصویر کے اوپر اور نیچے خالی جگہ نظر آنے سے پریشان ہوتے ہیں۔
