مجھے جوتے بھجوانے والوں تک کو پریشان کیا جا رہا ہے، عمران خان

پاکستان تحریک انصاف (پی ٹی آئی) کے چیئرمین عمران خان نے کہا ہے کہ میرے مخالفین مجھے نااہل کروا کر جیل بھیجنے کے لیے ہر حد تک گرنے کے لیے تیار ہیں۔

سماجی رابطے کی ویب سائٹ پر اپنی ایک ٹوئٹ میں انہوں نے لکھا کہ ایک شخص نے اپنے ڈرائیور کے ہاتھ مجھے جوتوں کا ڈبہ بھیجا تو پولیس ڈرائیور کے گھر پہنچ گئی اور اس کو ڈرانے دھمکانے کے بعد یہ کہنے پر مجبور کیا کہ وہ مجھے منشیات دینے کے لیے آیا تھا۔

I was sent a box of shoes from someone I know, it was delivered to my house by their driver, two days later the police turned up at the drivers house, harassing and threatening his poor family and forcing him to say that he came to deliver a box of drugs at my place.

This is… pic.twitter.com/JEj6ojoM84

— Imran Khan (@ImranKhanPTI) July 26, 2023

عمران خان نے کہا کہ جب مجرم ملک چلاتے ہیں تو پھر ایسے ہی ہوتا ہے، ایسے لوگ پھر بدمعاشوں کو اہم عہدوں پر بٹھاتے ہیں۔

واضح رہے کہ چیئرمین تحریک انصاف عمران خان 9 مئی کے واقعہ کے بعد سے زیر عتاب اور ان پر مختلف کیسز چل رہے ہیں اور اب یہ بھی امکان ظاہر کیا جا رہا ہے کہ 9 مئی کو آرمی تنصیبات پر ہونے والے حملوں کی منصوبہ بندی کے الزام میں ان کا کیس فوجی عدالت میں چلایا جائے گا۔

چیئرمین پاکستان تحریک انصاف عمران خان کو جب 9 مئی کو القادر ٹرسٹ کرپشن کیس میں گرفتار کیا گیا تو پی ٹی آئی کے کارکنوں نے ملک گیر احتجاج کیا تھا اور اس دوران کئی اہم تنصیبات پر بھی دھاوا بولا گیا تھا جس کی پاداش میں ہزاروں افراد کو گرفتار کیا تھا۔ ان میں سے کچھ کے کیسز فوجی عدالتوں کو بھیجے جا چکے ہیں۔

دوسری جانب چیئرمین پاکستان تحریک انصاف کا یہ موقف ہے کہ 9 مئی کے واقعہ میں پی ٹی آئی کا کوئی کردار نہیں بلکہ یہ ان کی جماعت کو دیوار کے ساتھ لگانے کے لیے پوری پلاننگ کے تحت یہ سب کیا گیا ہے۔