پاکستان بھر کے شہریوں نے صوبہ خیبر پختونخوا کے ضلع خیبر کے علاقے جمرود میں ہونے والے خود کش حملہ کی شدید الفاظ میں مذمت کرتے ہوئے کہا ہے کہ قوم دہشتگردی کے ناسور کو ختم کرنے کے لیے سیکیورٹی اداروں کے ساتھ کھڑی ہے۔
جمرود میں خود کش حملے کے خلاف ملک کے بیشتر شہروں میں سول سوسائٹی کی جانب سے ریلیوں کا انعقاد کیا گیا ہے، اسی سلسلے میں ایک عظیم ریلی لاہور میں نکالی گئی۔
ریلی میں شریک شہریوں نے جمرود میں خود کش دھماکے کی شدید مذمت کی۔ شرکا نے ہاتھوں میں ٹی ٹی پی دہشت گردوں کے خلاف پلے کارڈز اُٹھا رکھے تھے۔
ریلی میں مفتیان اور علما نے بھی اپنے خیالات کا اظہار کرتے ہوئے کہا کہ پہلے بھی ایسا ہی ایک خودکش حملہ پولیس لائنز کی مسجد میں کیا گیا جہاں کافی تعداد میں پولیس کے جوان شہید ہوئے، آخر مساجد ہی کو کیوں شہید کیا جاتا ہے، نمازیوں کا کیا قصور ہے؟
شرکا نے کہا کہ یہ بات واضح ہو چکی ہے کہ ٹی ٹی پی اسلام دشمن، پاکستان دشمن اور عوام دشمن دہشت گرد جماعت ہے، ہم مطالبہ کرتے ہیں کہ ٹی ٹی پی کے دہشتگردوں کو ان کے سہولت کاروں اور محفوظ ٹھکانوں سمیت ختم کیا جائے۔
شہریوں نے کہا کہ پوری قوم دہشتگردی کے ناسور کو جڑ سے اکھاڑ کر پھینکنے کے لیے اپنے سیکیورٹی اداروں کے ساتھ ہے۔ ریلی کے شرکاء نے پولیس، پاک فوج اور دیگر سیکیورٹی اداروں کے شہدا کے حق میں نعرے بھی بلند کیے۔
واضح رہے کہ منگل کے روز ضلع خیبر کے علاقے جمرود میں ایک مسجد میں خود کش دھماکہ ہوا جس کے نتیجے میں ایڈیشنل ایس ایچ او عدنان آفریدی شہید ہو گئے تھے۔ سیکیورٹی اداروں نے خود کش حملہ آور کے ساتھی کو گرفتار کر لیا ہے۔
