بلاول بھٹو کا اقوام متحدہ کے سیکریٹری جنرل کو ٹیلیفون، اسلامو فوبیا سے نمٹنے کے لیے حکمت عملی پر زور

وزیر خارجہ بلاول بھٹو زرداری نے اقوام متحدہ کے سیکریٹری جنرل انتونیو گوتریس کو ٹیلیفون کیا ہے۔

ترجمان دفتر خارجہ کے مطابق وزیر خارجہ نے یورپ میں قرآن پاک کی بے حرمتی کے بار بار ہونے والے واقعات کی مذمت کرتے ہوئے بین المذاہب ہم آہنگی اور پرامن بقائے باہمی کے لیے اقوام متحدہ کے سیکریٹری جنرل کی وکالت کو سراہا۔ انہوں نے اسلامو فوبیا کے بڑھتے ہوئے رجحان سے نمٹنے کے لیے ایک جامع حکمت عملی اور ایکشن پلان تشکیل دے کر اقوام متحدہ کی سطح پر اجتماعی کارروائی پر زور دیا۔

وزیر خارجہ نے بلیک سی گرین انیشیٹو (بی ایس جی آئی) کو روکنے اور دنیا بھر میں غذائی مسئلے پر اس کے اثرات کے بارے میں پاکستان کے نقطہ نظر سے آگاہ کیا۔

ترجمان نے بتایا کہ گزشتہ سال ’بی ایس جی آئی‘ معاہدے کو حتمی شکل دینے میں اقوام متحدہ کے سیکریٹری جنرل کے مثبت کردار کی تعریف کرتے ہوئے وزیر خارجہ نے درخواست کی کہ وہ تعمیری بات چیت کے ذریعے اس اقدام کو بحال کرنے کے لیے اپنی قیمتی مصروفیات جاری رکھیں جو تمام فریقوں کے خدشات کو دور کرے۔

وزیر خارجہ اور اقوام متحدہ کے سیکریٹری جنرل نے گزشتہ سال کے تباہ کن سیلاب کے تناظر میں اقوام متحدہ کے ساتھ پاکستان کے جاری تعاون پر بھی تبادلہ خیال کیا۔

وزیر خارجہ نے سیکریٹری جنرل کو سندھ میں سیلاب سے متاثر ہونے والی خواتین کو زمین کے ٹائٹل فراہم کرنے کے لیے شروع کیے گئے حالیہ منصوبے سے بھی آگاہ کیا۔