پاکستان نے مالی سال 23-2022 کے پہلے 11 ماہ کے دوران مختلف ممالک میں مختلف سفری خدمات فراہم کرکے 90کروڑ ڈالر سےزیادہ کمائے ہیں۔
ادارہ برائے شماریات پاکستان (پی بی ایس) کے جاری کردہ اعداد و شمار کے مطابق مالی سال 22-2021 کے مقابلے میں پاکستان نے 86.99 فیصد کی شرح نمو حاصل کی ہے۔
بدترین معاشی بحران سے گزرنے کے باوجود پاکستان مالی سال 23-2022 میں 935.172 ملین ڈالر کمانے میں کامیاب رہا جبکہ 2021-22 میں اسی مد میں پاکستان نے 500.130 ملین ڈالر کمائے تھے۔
جولائی تا مئی 2023 کے دوران ذاتی سفری خدمات میں 86.48 فیصد اضافہ ہوا جو گزشتہ سال کے 497.560 ملین ڈالر سے بڑھ کر 927.872 ملین ڈالر ہو گیا۔
پرسنل سروسز میں صحت سے متعلق اخراجات کی برآمدات 33.02 فیصد اضافے کے ساتھ 3.150 ملین ڈالر سے بڑھ کر 4.190 ملین ڈالر جبکہ تعلیم سے متعلق اخراجات بھی 3.64 فیصد اضافے کے ساتھ 10.170 ملین ڈالر سے بڑھ کر 10.540 ملین ڈالر ہوگئے۔
دریں اثنا پی بی ایس کے اعداد و شمار سے پتہ چلتا ہے کہ کاروباری برآمدات میں 184.05 فیصد اضافہ ہوا، جو 2.570 ملین ڈالر سے بڑھ کر 7.300 ملین ڈالر ہو گئیں۔
مالی سال 2022-23 کے دوران ملک سے خدمات کی برآمدات میں گزشتہ سال کے اسی عرصے کے مقابلے میں 2.78 فیصد اضافہ ریکارڈ کیا گیا۔
جولائی تا جون 2022-23ء کے دوران خدمات کی برآمدات 7,300.13 ملین ڈالر ریکارڈ کی گئیں جبکہ گزشتہ سال کے اسی عرصے کے دوران برآمدات 7,102.35 ملین ڈالر تھیں۔
ملکی درآمدات میں 38.04 فیصد کمی ریکارڈ کی گئی جو گزشتہ سال کے 12,942.46 ملین ڈالر سے کم ہو کر 8 ہزار 19.58 ملین ڈالر رہ گئی۔
