جیو کی جانب سے پیش کیے جانے والی نئی ڈرامہ سیریل ’جنت سے آگے‘ کا اوریجنل ساؤنڈ ٹریک (او ایس ٹی) ریلیز ہوتے ہی شائقین کے دلوں میں گھر کر چکا ہے۔ گانے کو یوٹیوب پر ریلیز کے صرف 20 گھٹنوں میں اڑھائی لاکھ سے زائد ویوز مل چکے ہیں۔
قرۃ العین بلوچ اور شجاع حیدر کی سریلی آواز میں پنجابی اور اردو کے تڑکے میں ریکارڈ اس گانے نے ناظرین و سامعین کو اپنے سحر میں جکڑ لیا ہے۔ سوشل میڈیا پر دھوم مچانے میں شجاع حیدر کی شاعری اور موسیقی نے سونے پہ سہاگے کا کام کیا ہے۔
’جنت سے آگے‘ میں کبریٰ خان، رمشا خان، گوہر رشید اور طلحہ چاہور سمیت دیگر کاسٹ شامل ہے۔ ڈرامے کی کہانی عمیرہ احمد نے لکھی ہے اور ہدایت کار حسیب حسن ہیں۔
