پاکستان اور بھارت کے درمیان ایشیا کپ کا میچ بارش کی نذر ہونے سے قومی کرکٹ ٹیم کے کپتان بابر اعظم کا اہم خواب چکنا چور ہو گیا ہے۔
قومی کرکٹ ٹیم کے کپتان جہاں آج کا میچ جیتنے کے لیے پُر عزم تھے وہیں ایک روزہ کرکٹ میں تیز ترین 2 ہزار اسکور مکمل کرنے پر بھی ان کی نظریں مرکوز تھیں۔ مگر بارش کے باعث پاکستان کی اننگز شروع ہی نہ ہو سکی اور میچ بے نتیجہ ختم کرنے کا اعلان ہو گیا۔
بابر اعظم اب تک ایک روز میچوں میں اپنی 30 اننگز میں 1994 رنز اسکور کر چکے ہیں، یہ ریکارڈ اِس وقت بھارتی کرکٹ ٹیم کے سابق کپتان ویرات کوہلی کے پاس ہے جنہوں نے 36 اننگز میں اپنے 2 ہزار رنز مکمل کیے۔
مزید پڑھیں
آج کے میچ میں اگر پاکستان اپنی اننگز کھیلتا تو کپتان بابر اعظم کو اپنے2 ہزار رنز مکمل کرنے کا موقع بھارت کے خلاف میچ میں ہی مل جاتا۔
ایک روزہ کرکٹ میں 2 ہزار رنز مکمل کرنے والوں میں اس وقت دوسرے نمبر پر جنوبی افریقا کے سابق کپتان اے بی ڈویلیئرز ہیں، جنہوں نے 41 اننگز میں یہ ریکارڈ اپنے نام کیا تھا۔
واضح رہے کہ قومی کرکٹ ٹیم کے کپتان بابر اعظم نے ایشیا کپ کے پہلے میچ میں جنوبی افریقا کے کرکٹر ہاشم آملہ کا تیز ترین 19ون ڈے سینچریاں بنانے کا ریکارڈ بھی اپنے نام کرلیا تھا۔ بابر اعظم نے 102 ویں اننگز میں 19ویں سینچری اسکور کی، جبکہ جنوبی افریقا کے ہاشم آملہ نے یہ اعزاز 104 نمبر کی اننگز میں اپنے نام کیا تھا۔
یہ بھی یاد رہے کہ بھارت کے خلاف آج ہونے والے میچ میں پاکستانی بولرز نے بھرپور کارکردگی کا مظاہرہ کیا اور بھارت کی پوری ٹیم کو 266 رنز پر آل آؤٹ کر دیا تھا، مگر اس کے بعد بارش کی وجہ سے پاکستان اپنی اننگز نہیں کھیل سکا جس کی وجہ میچ بے نتیجہ ختم کرنے کا اعلان کر دیا گیا۔
