سرخ رنگ کا یہ لذیذ پھل دیکھنے میں جتنا خوبصورت ہے انسانی صِحَت کے لئے بھی اُتنا ہی فائدہ مند ہے۔
امریکا میں بیریوں کی افادیت کی سالانہ میٹنگ میں اسٹرابری کا ایک اور فائدہ بھی سامنے آ گیا۔ ماہرین نے کہا ہے انہیں مزید ثبوت ملے ہیں کہ اسٹرابری قلبی صحت کو بڑھا سکتی ہے۔
الینوائے انسٹی ٹیوٹ آف ٹیکنالوجی سے وابستہ پروفیسر برٹ برٹن فری مین کہتے ہیں اگر غذا میں پھل کا حصہ غائب کردیا جائے تو اس سے امراضِ قلب اور ذیابیطس کا خطرہ بڑھ سکتا ہے۔ لیکن اس ضمن میں اسٹرابری دل کو توانا رکھنے اور ذیابیطس سے بچنے میں انتہائی اہم کردار ادا کرسکتی ہے۔
تاہم ضروری ہے کہ روزانہ ایک کپ بھر کر اسٹرابری کھائی جائے۔
اسٹرابری کھانے سے مضر صحت کولیسٹرول، اندرونی سوزش اور آکسیڈیٹو اسٹریس کم ہوتی ہے۔ اس کے ساتھ ہی بلڈ پریشر بھی معمول پر رہتا ہے۔ ماہرین نے یہ بھی دیکھا کہ قلبی صحت کے کئی طبی مسائل بھی اسٹرابری کھانے سے بہتر ہوجاتے ہیں۔
رپورٹس کے مطابق ایک اور سروے سے معلوم ہوا کہ اسٹرابری کا باقاعدہ استعمال بالغوں میں ٹائپ ٹو ذیابیطس کو روکتا ہے اور یوں اسے علاج بالغذا کا درجہ دیا جاسکتا ہے۔
دوسری جانب روزانہ صرف آٹھ اسٹرابری کھانے سے وٹامن سی کی ضرورت پوری ہوجاتی ہے۔ اسے کھانے کی عادت بنا لینا ہی دل کے امراض سے بچنے کا نسخہ ہے۔
