نگراں وزیراعلیٰ پنجاب محسن نقوی نے چینی کی قیمتوں میں استحکام لانے کے لیے فوری اقدامات اٹھانے کی ہدایت کی ہے۔
منگل کو وزیراعلیٰ پنجاب کی زیر صدارت اہم اجلاس ہوا، جس میں چینی کی قیمتوں میں ہوشربا اضافے کے بعد عوام کی مشکلات پر تبادلہ خیال کیا گیا۔
سیکریٹری خوراک نے چینی کی قیمتوں میں اضافے اور لاہور ہائیکورٹ کے 2 اسٹے آرڈرز کے بارے میں بریفنگ دی۔
مزید پڑھیں
سیکرٹری خوراک نے بتایا کہ لاہور ہائی کورٹ کے اسٹے آرڈرز کے باعث شوگر ملز کا ریکارڈ حاصل نہیں کیا جا سکتا۔ اور اسی وجہ سے ذخیرہ اندوزوں کو کھلی چھٹی ملی ہوئی ہے اور عوام مشکلات کا شکار ہیں۔
اس موقع پر اجلاس میں فیصلہ کیا گیا کہ لاہور ہائیکورٹ سے اسٹے ختم کرانے کے لیے فوری اپیل دائر کی جائے گی۔
وزیراعلیٰ پنجاب محسن نقوی نے ایڈووکیٹ جنرل پنجاب کو اپیل دائر کرنے کے حوالے سے ہدایات جاری کیں۔
واضح رہے کہ اس وقت ملک میں چینی کی قیمتیں 200 روپے کلو سے تجاوز کر گئی ہیں، جس کے باعث پہلے سے ہی مہنگائی کے مارے عوام چکرا کر رہ گئے ہیں۔
اتحادی حکومت نے اس سے قبل چینی برآمد کرنے کی اجازت دی تھی، سابق وزیر پلاننگ و ڈویلپمنٹ احسن اقبال نے اس حوالے سے سارا ملبہ پیپلزپارٹی کے سابق وزیر نوید قمر پر ڈالتے ہوئے کہا تھا کہ یہ اجازت ان کی وزارت نے دی تھی۔
دوسری جانب نوید قمر نے وضاحت دیتے ہوئے کہا تھا کہ پاکستان میں چینی وافر مقدار میں موجود تھی اس لیے برآمد کرنے کی اجازت دی۔ اس وقت بھی ملک میں چینی کا کوئی بحران نہیں، صرف ذخیرہ اندوزوں نے مصنوعی بحران پیدا کیا ہوا ہے۔
