کراچی کے علاقے شاہ فیصل کالونی میں ڈاکوؤں نے ملازمین سے بھری فیکٹری کی بس کو لوٹ لیا ہے۔
میڈیا رپورٹس کے مطابق لیدر گارمنٹس فیکٹری کی بس 70 کے قریب ملازمین کو لے کر جا رہی تھی، جہاں ڈاکوؤں نے اسلحہ کے زور پر انہیں لوٹ لیا اور فرار ہو گئے۔
پولیس نے بتایا ہے کہ 3 موٹرسائیکلوں پر سوار 6 مسلح ڈاکوؤں نے ملازمین سے 65 موبائل فون لوٹے ہیں، لٹنے والے ملازمین میں 62 مرد، 8 خواتین ورکرز سمیت بس ڈرائیور بھی شامل ہے۔
متاثرین نے واردات کے بعد تفصیلات بتاتے ہوئے کہا کہ ڈاکو موبائلز کے ساتھ پرس اور نقدی بھی چھین کر لے گئے، جس کے باعث مددگار 15 پر اطلاع دینے کے لیے بھی کوئی موبائل نہ بچا۔
بعدازاں متاثرہ افراد کمپنی کی بس میں ہی تھانے میں پہنچے اور کارروائی کی درخواست کی، مگر تاحال مقدمے کا اندراج نہیں ہو سکا۔
