ایشیا کپ سپر فور مرحلے کے اہم میچ سے قبل قومی ٹیم کو دھچکا لگا ہے، اور فاسٹ بولر نسیم شاہ ایونٹ سے باہر ہو گئے ہیں۔
پاکستان اور سری لنکا کے درمیان کل جمعرات کو کولمبو میں کھیلا جانے والا میچ انتہائی اہمیت کا حامل ہے، جو بھی ٹیم فاتح قرار پائے گی وہ بھارت کے ساتھ ایشیا کپ کا فائنل کھیلے گی۔
مزید پڑھیں
فاسٹ بولر نسیم شاہ بھارت کے خلاف سپر فور مرحلے کے میچ میں انجرڈ ہو گئے تھے، انہیں میچ کے دوران دائیں کندھے پر چوٹ لگی تھی، اب ان کی جگہ زمان خان کو ٹیم میں شامل کر لیا گیا ہے۔
ایشیا کپ کے اہم ایونٹ کے بعد ورلڈکپ کو مدنظر رکھتے ہوئے نسیم شاہ کو طبی امداد دی جا رہی ہے، اور تمام ضروری احتیاطی تدابیر بھی اختیار کی جا رہی ہیں۔
دوسری جانب بھارت کے خلاف ہی میچ میں زخمی ہونے والے حارث رؤف کے حوالے سے بتایا جا رہا ہے کہ وہ اب ٹھیک ہو رہے ہیں۔
حارث رؤف بھارت کے خلاف میچ کے دوران بال لگنے سے دائیں طرف کی پسلی میں انجری کا شکار ہوئے تھے۔
قومی ٹیم کو طبی سہولیات فراہم کرنے والے ڈاکٹر سہیل نسیم نے کہا ہے کہ یہ دونوں فاسٹ بولر ہمارا اثاثہ ہیں، ٹیم کا میڈیکل پینل ورلڈ کپ سے قبل ان کو بہترین طبی سہولیات فراہم کرے گا۔
