پاکستان نےرواں مالی سال کے پہلے 2 ماہ کے دوران 233.991 ملین ڈالر مالیت کے 340,237 میٹرک ٹن سے زائد چاول برآمد کیے ہیں۔
ادارہ شماریات کی رپورٹ کے مطابق گزشتہ سال کی اسی مدت میں 283.056 ملین ڈالر مالیت کے 507,144 میٹرک ٹن چاول برآمد کیے گئے تھے، جولائی تا اگست 2023 کے دوران ملک سے چاول کی برآمدات میں گزشتہ سال کی اسی مدت کی برآمدات کے مقابلے میں 17.33 فیصد کمی واقع ہوئی۔
رپورٹ کے مطابق زیر جائزہ مدت کے دوران باسمتی چاول کی برآمدات میں 8.29 فیصد اضافہ ہوا ہے۔
مچھلی کی برآمدات سے 39 ملین ڈالر سے زائد کمائے گئے
دریں اثنا پاکستان نے تقریباً 20,539 میٹرک ٹن مچھلی اور مچھلی کی مصنوعات کو برآمد کرکے 39.338 ملین ڈالر کمائے۔
رواں مالی سال کے پہلے 2 ماہ کے دوران فوڈ گروپ کی برآمدات میں 1.65 فیصد کمی واقع ہوئی ہے کیونکہ گزشتہ سال کی اسی مدت میں 723.696 ملین ڈالر کی برآمدات کے مقابلے میں 711.748 ملین ڈالر مالیت کی غذائی اجناس برآمد کی گئی تھیں۔
دوسری جانب رواں مالی سال کے پہلے 2 ماہ کے دوران ملک میں فوڈ گروپ کی درآمدات میں گزشتہ سال کی اسی مدت کی درآمدات کے مقابلے میں 26.91 فیصد کمی واقع ہوئی ہے۔
جولائی تا اگست 2023 کے دوران ملک میں خوراک کی درآمدات 1.783 بلین ڈالر سے کم ہو کر 1.303 بلین ڈالر رہ گئیں۔
