ایف آئی اے کا کرنسی اسمگلرز اور حوالہ ہنڈی میں ملوث عناصر کے خلاف کریک ڈاؤن جاری، گزشتہ ہفتے کے دوران مزید 11 افراد کو گرفتار کر لیا گیا ہے جن سے کروڑوں روپے مالیت کی غیر ملکی کرنسی برآمد کر لی گئی ہے۔
ڈائریکٹر جنرل ایف آئی اے کی ہدایت پر کرنسی اسمگلرز اور ہنڈی حوالہ میں ملوث عناصر کے خلاف گھیرا تنگ کرتے ہوئے 7 چھاپہ مار کارروائیاں کی گئیں، جس کے نتیجے میں 11 ملزمان گرفتار کیے گئے۔
ترجمان ایف آئی اے کے مطابق ان کارروائیوں کے نتیجے میں گرفتار ملزمان پر 6 مقدمات درج کیے گئے ہیں، ہنڈی حوالہ میں ملوث ملزمان کے خلاف 5 انکوائریوں کی تفتیش بھی مکمل کر لی گئی ہے۔
گرفتار ملزمان سے مجموعی طور پر6 ہزار 400 امریکی ڈالر جبکہ 1 کروڑ 67 لاکھ سے زائد مالیت کی دیگر ملکی و غیر ملکی کرنسی برآمد کی گئی ہے۔
مزید پڑھیں
ترجمان کے مطابق گرفتار ملزمان مختلف کاروبار کی آڑ میں کرنسی کی غیر قانونی ایکسچینج میں ملوث تھے، ایف آئی اے نے ہنڈی حوالہ اور کرنسی کی غیر قانونی ایکسچینج میں ملوث ملزمان کے خلاف انٹیلیجنس بیسڈ کارروائیوں کا آغاز کر دیا ہے۔
ترجمان ایف آئی اے کے مطابق بیرون ملک مقیم ہنڈی حوالہ اور غیر قانونی کرنسی ایکسچینج ڈیلروں کے خلاف بھی گھیرا تنگ کیا جا چکا ہے۔ ملزمان کی گرفتاری کے لیے قانون نافذ کرنے والے اداروں کی بھی معاونت حاصل کی جا رہی ہے۔
واضح رہے گزشتہ ایک ماہ کے دوران کرنسی اسمگلرز اور حوالہ ہنڈی کے غیر قانونی کاروبار میں ملوث افراد کے خلاف متعدد کارروائیاں کی گئی ہیں جس کے نتیجے میں اوپن مارکیٹ میں روپے کے مقابلے میں ڈالر کا ریٹ کافی حد تک نیچے آچکا ہے۔
