عمران خان کے بغیر کوئی انتخابات قبول نہیں کریں گے، پی ٹی آئی

پاکستان تحریک انصاف (پی ٹی آئی) نے کہا ہے کہ عمران خان یا تحریک انصاف کی شمولیت کے بغیر کروایا گیا کوئی بھی الیکشن غیرآئینی، غیرقانونی اور غیراخلاقی ہوگا جسے عوام ہرگز قبول نہیں کریں گے۔

نگراں وزیراعظم انوارالحق کاکڑ کے انٹرویو پر ردعمل دیتے ہوئے ترجمان پاکستان تحریک انصاف نے کہاکہ نگران وزیراعظم کا بیان آئین، جمہوریت اور ملکی مفادات کے حوالے سے ریاستی ڈھانچے میں پائی جانے والی عدم حساسیّت کا مظہر ہے۔

پی ٹی آئی ترجمان کے مطابق تحریک انصاف پاکستان کی سب سے بڑی اور وفاقی سطح پر عوام کی واحد نمائندہ سیاسی جماعت ہے۔ مقبولیت کے تمام معیارات کے مطابق عمران خان ملک کے مقبول ترین سیاسی قائد ہیں۔

انہوں نے کہاکہ غیرمعمولی عوامی تائید کی حامل سیاسی قیادت اور جماعتوں کو مصنوعی، غیرجمہوری اور غیرآئینی طریقوں سے انتخاب سے باہر کرنے کے نتائج ہمیشہ تباہ کن ہوا کرتے ہیں۔

انہوں نے کہاکہ دستور، قانون، جمہوریت اور اخلاق نگراں وزیراعظم کو سیاست و انتخاب پر اثرا انداز ہونے کے کسی غیرفطری، غیرجمہوری اور غیرآئینی منصوبے کا حصہ بننے کی ہرگز اجازت نہیں دیتے۔

پی ٹی آئی ترجمان نے مطالبہ کیا ہے کہ انوارالحق کاکڑ اپنے بیان کی فوری وضاحت کریں اور بطور نگران وزیراعظم اپنی حکومت کو جمع تفریق کے شرانگیز منصوبوں سے مکمل الگ کریں۔

یہ بھی پڑھیں پی ٹی آئی کے بغیر بھی ملک میں منصفانہ انتخابات ہو سکتے ہیں، نگراں وزیراعظم انوار الحق کاکڑ

واضح رہے کہ نگراں وزیراعظم انوارالحق کاکڑ نے امریکی خبررساں ادارے کو دیے گئے انٹرویو میں کہا تھا کہ ملک کے انتخابی عمل میں فوج کی مداخلت کے الزامات مکمل مضحکہ خیز اور بے بنیاد ہیں، عمران خان کی پارٹی اور اس کے کارکنوں پر 9 مئی کے واقعات میں توڑ پھوڑ کے الزامات ہیں، ملک میں آئندہ عام انتخابات عمران خان اور ان کی پارٹی کے بغیر بھی منصفانہ ہو سکتے ہیں۔

انوار الحق کاکڑ نے کہا تھا کہ ملک میں انتخابات پاکستان کی افواج نہیں بلکہ اس کا آئینی ادارہ الیکشن کمیشن آف پاکستان کرانے جا رہا ہے جس کا سربراہ اس وقت خود سابق وزیر اعظم عمران خان نے تعینات کیا تھا، پھر وہ کیوں الیکشن کمیشن کے خلاف کوئی غلط لفظ استعمال کریں گے۔