آرمی چیف جنرل عاصم منیر نے وسائل کی چوری اور معاشی نقصانات کو روکنے کے لیے غیر قانونی سرگرمیوں کے خلاف کارروائیاں جاری رکھنے کے عزم کااعادہ کیا ہے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر نے کہا ہے کہ قانون نافذ کرنے والے ادارے اور حکومت وسائل کی چوری اور معاشی نقصانات کو روکنے کے لیے پوری قوت کے ساتھ غیر قانونی سرگرمیوں کے خلاف نبرد آزما ہوں گے۔
مزید پڑھیں
آئی ایس پی آر کی جانب سے جاری بیان میں کہا گیا ہے کہ آرمی چیف کو سندھ کی صوبائی ایپکس کمیٹی کے اجلاس جس میں نگران وزیراعلیٰ جسٹس (ر) مقبول باقر نے بھی شرکت کی، سے خطاب کے دوران نظر ثانی شدہ نیشنل ایکشن پلان، سندھ کے دریائی علاقوں میں آپریشنز، پاک چین اقتصادی راہداری (سی پیک) پر کام کرنے والے غیر ملکی شہریوں کی سیکیورٹی اور دیگر نجی منصوبوں سمیت متعدد اہم امور پر بریفنگ دی گئی۔
شرکائے اجلاس نے غیر قانونی طور پر مقیم غیر ملکیوں کی وطن واپسی اور غیر ملکی کرنسی ریگولیشن کے اقدامات پر بھی تبادلہ خیال کیا۔
پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران کراچی ٹرانسفارمیشن پلان اور خصوصی سرمایہ کاری سہولت کونسل (ایس آئی ایف سی) کے تحت اقدامات پر بھی تبادلہ خیال کیا گیا۔
آئی ایس پی آرکے مطابق آرمی چیف جنرل عاصم منیر نے اجلاس سے خطاب کے دوران کہا کہ ’ایل ای اے‘ اور دیگر سرکاری محکمے غیر قانونی سرگرمیوں کے خلاف کارروائیاں پوری قوت کے ساتھ جاری رکھیں گے تاکہ ان سرگرمیوں کی وجہ سے ملک کو ہونے والے وسائل اور معاشی نقصانات سے بچایا جا سکے۔
انہوں نے تاریخی اقدامات کے فائدہ مند ثمرات کے لیے تمام متعلقہ محکموں کے مابین ہم آہنگی کی ضرورت پر بھی زور دیا۔
آئی ایس پی آر نے مزید بتایا کہ اجلاس کے شرکاء نے اس بات کا بھی اعادہ کیا کہ صوبے کی ترقی اور خوشحالی کے لیے ریاستی ادارے، سرکاری محکمے اور عوام متحد ہیں۔
گزشتہ ماہ بھی اسی طرح کی اپیکس کمیٹی کے اجلاس خیبر پختونخوا اور پنجاب میں منعقد ہوئے تھے۔ ملاقاتوں کے دوران آرمی چیف نے صوبوں کو یقین دلایا تھا کہ وہ پاکستان کو ‘بڑے معاشی نقصانات’ سے نجات دلانے کے لیے اقدامات کریں گے۔
اگست میں جنرل منیر نے عبوری حکومت سے وعدہ کیا تھا کہ معیشت کی بحالی اور ملک کو ترقی و خوشحالی کی طرف لے جانے کے لیے پالیسیوں کے تسلسل کے لیے فوج ان کی ہر ممکن مدد کرے گی۔
