پولیس نے کراچی کے علاقے ڈیفنس میں ایک تاجر سے چھینے گئی 50 لاکھ کی خطیر رقم برآمد کرلی۔
ڈیفنس تھانہ پولیس کے مطابق یہ واقعہ 15 اگست کو پیش آیا تھا جب مذکورہ تاجر ڈیفنس لائیبریری کے پاس سے گزر رہے تھے کہ 4 موٹر سائکل سوار ڈکیتوں نے اسلحے کے زور پر ان سے 50 لاکھ روپے چھین لیے تھے۔
واقعے کا نوٹس لیتے ہوئے پولیس کے اعلیٰ افسران نے ملزمان کی گرفتاری اور لوٹی گئی رقم کی برآمدگی کا ٹاسک اور مقدمے کی تفتیش ایس آئی یو کے سپرد کی تھی۔
ایس آئی یو نے اپنی تحقیقات کا آغاز کیا اور ٹیکنیکل بنیادوں پر وسائل بروئے کار لاتے ہوئے ڈکیتی کی واردات میں ملوث 3 ملزمان کو زخمی حالت میں لوٹی ہوئی رقم کے ساتھ گرفتار کر لیا۔
پولیس کے مطابق گرفتار ملزمان میں عبدالرحمان، محمد عامر اور اختر عرف پپو شامل ہیں جبکہ ان سے مزید تفتیش جاری ہے۔
